"Araz-Naxçıvan" "Turan Tovuz" üzərində qazandığı qələbədən sonra yenidən lider oldu. Bəllidi ki, hazırda "Qarabağ"la rəqabət aparan yeganə komanda elə Muxtar Respublika təmsilçisidi.

Düzdü, bu gün "köhlən atlar" Azərbaycan derbisində "Neftçi"ni meğlub etsə, "qırmızı-ağlar"ı yenidən ikinci pillədə görəcəyik. Amma bu, reallığı dəyişmir: Elmar Baxşıyevin komandası indiyə qədər keçirdiyi 15 matçda cəmi bir dəfə uduzub, 3 heç-heçə, 11 qələbə sayəsində 36 xal toplayıb!

Göründüyü kimi, "Araz-Naxçıvan" tarixinin ən uğurlu dönəmini yaşayır. Amma boşuna deməyiblər: "hər gözəlin bir eybi var". Söhbət komandanı həm ev, həm də səfər oyunlarında azarkeşsiz qalmasından gedir. Tribunalarda "qırmızı-ağlar"ı dəstəkləyən bir nəfər belə yoxdu desək, doğru olmaz. Problem onların barmaqla sayılacaq qədər olmasındadı.

Ötən mövsüm də belə idi. Dəqiq desək, Muxtar Respublika təmsilçisinin 2023/24 "futbol ili"ndə keçirdiyi 18 ev matçını 10390 tamaşaçı izləyib. Bu, orta hesabla hər oyunda 577 nəfərin olması deməkdi. Yeni mövsümdə isə rəqəmlər iki dəfədən çox azalıb! Kollektivin ilk 15 turda keçirdiyi 8 ev matçında tribunalarda ümumilikdə 2000 tamaşaçı əyləşib. Bu, hər qarşılaşmanı orta hesabla 250 azarkeşin izləməsi deməkdi. Azalıbmı? Azalıb!

Səbəblərdən agahıq. "Araz-Naxçıvan"ın fanklubu "Sektor 85" sanki qeybə çəkilib. Bu öz yerində. Klubun azarkeşləri tribunalara cəlb etməklə bağlı layihəsi yoxdu. Biz belə təcrübəyə "Sabah", "Sumqayıt" və "Turan Tovuz"da rast gəlirik. Adı çəkilən klublar müxtəlif əyləncəli oyunlar və hədiyyələr ilə tərəfdarları stadiona cəlb etməyə çalışır. Təbii ki, komandanın ev oyunlarını keçirdiyi "Liv Bona Dea Arena"nın Mərdəkanda yerləşməsi də azarkeş sayına təsirsiz ötüşmür. Hələ oyunların klubun sosial şəbəkə hesablarında təbliğiylə bağlı çatışmazlıqları demirik...

Hər halda, ən yaxşı dönəmini yaşayan "Araz-Naxçıvan"ın azarkeş dəstəyinin belə aşağı səviyyədə olması nonsensdi! Güman ki, klub rəhbərliyi də bunu anlayır.

KƏNAN BAHADIR