“Araz-Naxçıvan”ın premyer-liqa macərası davam edir.

Muxtar Respublika təmsilçisi ölkə çempionatının ilk turunda “Turan Tovuz”a məğlub olubsa (0:3), 2-ci turda “Qəbələ”yə qalib gəlib (2:0). “Qırmızı-ağlar” hazırda ev matçlarını Bakıda – “Dalğa Arena”da keçirir. Komandanı tribunalarda dəstəkləyənlər sırasında vəfalı azarkeş qrupu “Nəqşicahan” da var.
Görəsən, fanklubun komandadan gözləntiləri hansı yöndədi? Tərəfdarlar yenidən qurulmuş heyəti necə dəyərləndirir? “Araz-Naxçıvan”ın hədəfləri haqda nə düşünür?

Suallarımızı “Nəqşicahan” azarkeş qrupunun İdarə Heyətinin sədri Yağmur İbrahimova ünvanladıq. Onun “Football-plus.az”a söylədikləri:
“9 illik fasilədən sonra premyer-liqaya qayıtdıq. Baş məşqçimiz Azər Bağırov yaxşı komanda formalaşdırıb. İki turun nəticələrinə görə 3 xal əldə etmişik. Mövsümboyu maraqlı matçlar bizi gözləyir. “Araz-Naxçıvan”a inanırıq. İnşallah, uğurlu “futbol ili” keçirib Konfrans Liqasına vəsiqə qazanacağıq. Klubun ən böyük hədəfi ölkəmizi Avropada layiqincə təmsil etmək, ən azı bir neçə təsnifat mərhələsi adlamaqdı.

Bilindiyi kimi, biz fanklub olaraq Bakıdayıq. Komanda indi “Dalğa Arena”da məskunlaşdığından həm ev, həm də səfər oyunlarında iştirak edə biləcəyik. Naxçıvana qayıdandan sonra, sadəcə, səfər matçlarında tribunalarda olacağıq. Ev matçlarında isə “Ultra Araz” fanklubu dəstək göstərəcək.

Hazırda yeni layihələr üzərində çalışırıq. Kreativ fikirlərimiz var ki, futbolçularımız üçün tribunalarda maraqlı işlər görək”.

KƏNAN BAHADIR