Bu gün Misli premyer-liqasında 8-ci tura start veriləcək.

Günün yeganə oyunu, həmişəki kimi, “CBC Sport”un efirində canlı yayınlanacaq.

Misli premyer-liqası
1-ci dövrə, 8-ci tur
Araz-Naxçıvan – Səbail 3:2
Bəxtiyar Həsənalızadə,52. Felipe Santos, 58-pen. Bernardo Dias, 84 - Qorka Laruçça,45+2,89
“Araz-Naxçıvan”ın bu rəqiblə ev oyunlarının balansı: 2:+0=1-1, 1:3.
2023/24 – 1:1, 0:2.
Cəzalı: Ömər Buludov (Araz-Naxçıvan).
“Futbol+”in proqnozu: 30-30-40.
27 sentyabr. Sumqayıt, "Kapital Bank Arena". Saat 19.00.

“Araz-Naxçıvan” çempionata uğurlu start verib. “Qırmızı-ağlar” ötən həftə liderliyi “Qarabağ”dan almaq məqsədilə meydana çıxan “Turan Tovuz”u məğlub etməklə xal ehtiyatını yaxşılaşdırdı. Düzdü, çoxu bunu Elçin Məsiyevin məlum qərarı ilə bağlayır. Lakin Muxtar Respublika təmsilçisinin oyun tərzində də müsbət dəyişikliklərə şahidlik etdik. Görünür, Elmar Baxşıyev rəhbərliyin avrokuboklara vəsiqə tələbini diqqət mərkəzində saxlayır və özü də məhz bu hədəfə köklənib. Belədə “Səbail”in qarşısına daha güclü və motivasiyalı çıxmaq baxımından əngəl yoxdu. Təbii ki, burda “dənizçilər”in mövcud durumunun böyük payı var. Şahin Diniyevin “düzgün yoldayıq” deməsinə inanmaq sadəlövhlük olar. Axı Bayıl təmsilçisi sürətlə autsayderlər qrupunun parçası olmaqdadı. Komandanın hücumameyilli futbol oynaması müsbət hal olsa da, azarkeşlərin gözlədiyi qələbələrdən, ən pis halda heç-heçələrdən əsər-əlamət yoxdu. Artıq komandanın uğursuzluq limiti də tükənir. Yəqin ki, vəziyyət belə davam etsə, psixoloji durum da ürəkaçan olmayacaq.

Qısası, heç olmasa, ümumi göstəricilərinin “Səbail”dən yana olduğu matçda rəqibi məyus etmək vacibdi. Bu komandalar indiyə qədər 4 dəfə qarşılaşıb. Bunların 2-də “Səbail” qələbə qazanıb, 2-də isə “sülh” qeydə alınıb. Topların nisbətində “dənizçilər” öndədi - 6:3.

KƏNAN BAHADIR