Son aylarda “Cəbrayıl”ın adı maliyyə problemlərindən əziyyət çəkən klublar sırasında göstərilir. Bir aya yaxındı sular durulmur.

Səbəb Cəbrayıl təmsilçisinin əsas maliyyə dayağı sayılan Şahin Məmmədovun əlini klubdan çəkməsidi. Baş məşqçi Elhad Nəziri bir müddət əvvəl qəzetimizə açıqlamasında vəziyyətin acınacaqlı olduğunu etiraf etmiş, iş adamlarına səslənmişdi. “Cəbrayıl”ın təsisçisi Cavid Hüseynov klubun yanında olmağa çalışırdı. Amma hazırda “Səbail”i çalışdıran gənc mütəxəssis əvvəlki kimi rahat hərəkət edə bilməz. Son günlər yayılan iddialara görə, Cəbrayıl rayon icra hakimiyyətinin başçısı Kamal Həsənov da kluba vəd verdiyi 100-150 min manat yardımı ayırmaqdan boyun qaçırıb.

Bütün bu məsələlər ətrafında Şahin Məmmədovla danışmağı lazım bildik. Ancaq söhbət bir qədər də uzandı…

- Şahin bəy, söhbətə sizin klubdan uzaqlaşmağınızdan başlayaq. Niyə birdən-birə “Cəbrayıl”dan əlinizi çəkdiz?
- Klubdan əlimi çəkdiyimi demək olmaz. Əlimi çəkmək olarmı? Üç ildi, yəni yaranan gündən bəri "Cəbrayıl"layıq. Klubu yaratmışıq, Region Liqasından birinci liqaya qədər birgə gəlmişik. İşlərimlə bağlı müəyyən vaxta qədər əməkdaşlığı dayandırmişam. Tam demək olmaz ki, əlaqələrimiz kəsilib. Sonradan bərpa olunacaq. Mənəvi dəstək göstərilir. Amma məşqçilər, futbolçular hamısı mənim rəhbərliyim altında, komanda şəklində yığılıb. Ona görə də birdəfəlik əlimi çəkə bilmərəm. Yığılması, klubun toplanması, məşqçinin təyin olunması - hamısında birbaşa iştirakım olub. Bir ay əvvələ qədər bütün məsələləri mən həll edirdim. İndi şəxsi işlərimlə bağlı kənarlaşmışam. Ancaq yenə də məsləhət verir, işləri yönəldirik.

- Siz ayrılandan sonra Cavid Hüseynovun kluba nəzarət etdiyi deyilirdi. Amma artıq o da premier-liqa klubu “Səbail”i çalışdırır. Bəs qərarları kim verir?
- Çempionat gedərkən elə bir qərarlar verilmir. Cavid klubun təsisçisidi. Futbolçular yığılan vaxt, təlim-məşq toplanışı zamanı, baş məşqçi təyin edilərkən qərar verilir. Çempionat başlananda bütün planlar müzakirə olunur. Yəni radikal dəyişikliklər yoxdu axı. Çempionat davam edir. Hər şey qaydasıyla gedir. Elə bir qərar verilməli məsələ yoxdu.

- Amma çempionatda iki ay sonra fasilə olacaq. Nəzərdə tutduğunuz dəyişiklikləri o zaman kimin göstərişi ilə ediləcək?
- Həmin ərəfələrdə yenə bir yerə yığışıb məsləhətləşəcəyik. Qərarı toplu şəkildə verəcəyik. Bizdə təkbaşına qərar verilmir. Məşqçilər, klub rəhbərliyi birlikdə yekun qərar verir. Müzakirələrdən sonra yol xəritəsi cızırıq.

- Bir müddət öncə komandanın baş məşqçisi Elhad Nəziri üç ay ərzində 70 minə yaxın pul xərclədiyinizi dedi. Siz ayrılandan sonra rayonun icra başçısı Kamal Həsənov da maliyyə yardımını dayandırdı.
- Xeyr, 70 mini mən yox, klub xərcləyib. Mənim şəxsi xərcim olmayıb, klubdan ayrılıb. Hazırda müəyyən addımlar atılır. Çalışırıq ki, sponsorlar da cəlb edək. Komandanın inkişafına görə sponsor tapmalıyıq. Region Liqasında da, indiyə qədər də Cəbrayılın icra hakimiyyətinin başçısı Kamal müəllim kömək edib. Bu yaxınlara qədər dəstək verib. İş adamları da dəstək olub. İndi də çalışırıq ki, yerli iş adamlarını kluba cəlb edək. Ancaq futbolda bir qədər çətindi.

- Elhad Nəziri də təsdiqlədi ki, maliyyə böhranı yaşanır. Bəs xərcləri necə qarşılamaq, futbolçuların pulunu necə ödəmək fikrindəsiz?
- Kim deyirsə ki, maliyyə böhranı var, yanılır. Elə şey yoxdu. Hər deyilən söz doğru deyil. Onu gərək bilən adamdan sorusasız. Heç bir maliyyə böhranı yoxdu. Normal təlim-məşq toplanışı keçirmişik, komandaya gənc futbolçular gətirmişik. 1-ci liqada legionersiz komandayıq. Gənc futbolçulara üstünlük veririk. Maliyyə imkanlarımız digər iddialı klublardan zəif olsa da, özünüz də görürsüz ki, nəticələrimiz pis deyil. Gənclərlə belə nəticə, məncə, yaxşı göstəricidi. Bütün klublarda legioner var. Xaricdən futbolçu gətirmək də maliyyəyə söykənir. Bir legioneri transfer etmək üçün 5 min manat rüsum lazımdı. Bizim bugünkü prinsiplərimizə uyğun deyil. Yerli futbolçulara, gənclərə üstünlük veririk. Şəraitimiz olsa, bundan dəfələrlə yaxşı nəticə verərik. Nəziri ən perspektivli, gənc məşqçilərdən biridi. Biz ona, futbolçularımıza inanırıq. Bayaq dediyim kimi, yol xəritəmizi cızmışıq və o yolla komanda davam edir. Təlim-məşq toplanışına ən birinci başlayanlardan biri də bizik. Bu günə qədər də plana uyğun işlərimiz davam edir.

- Bir ara futbolçuların maaşları verilmədiyi üçün klubdaxili narazılıq da baş qaldırmışdı…
- Maliyyə məsələlərini gərək bilən adam desin. Kimsə əsəbləşib nəsə söz deyə bilər, hansısa gənc futbolçu dostlarıyla oturar söhbət edər. Açıq bəyan edim ki, bəli, büdcə 20 faiz azaldılıb. Ancaq bu, maliyyə böhranı demək deyil. Maliyyə böhranı məvacib almamaq, məşqlərə çıxmamaqdı. Bəzən lap böyük klublarda da cərimələr, büdcə azalması baş verir. Yəni müəyyən dövrü keçmək üçün zəruri addımlar var ki, onları atmaq lazımdı. Bu gün gənc uşaqlarla necə gəldi davam etsək, qışdan sonra maaş almayacaqlar. Bir də var ki, onlar sabil şəkildə bu maaşı alsın. Bu məsələlər "Karvan"la oyundan öncə başlamışdı. Bu ciddi məsələ olsaydı, heç uşaqlar birinci yerdə olan komandaya qarşı o cür oynamazdılar. Daxili problemlər oyuna müəyyən təsir göstərsə də, elə bir sıxıntı yoxdu.

- Bəs komandanın qarşısıda hədəf kimi hansı yeri tutmaq var?
- Əlbəttə, biz həmişə çempionluğu hədəf qoyuruq. İştirak etdiyimiz bütün turnirlərdə hədəfimiz çempionluq olub. Belə hədəfimiz olmasa, heç bir rəqabətdən söhbət gedə bilməz. Gənc uşaqlara necə başa sala bilərik ki, nə üçün komandanı qurmuşuq, bu çempionatda nə üçün iştirak edirik. Ötən il 2-ci liqada da bunun üçün mübarizə apardıq. Düzdü, 2-ci yeri tutduq, amma pley-off yolu ilə birinci dəstəyə adlaya bildik.

- Yəqin görürsüz ki, 1-ci liqada "Karvan", "Qəbələ", "İmişli" kimi iddialılar var.
- Bəli, çox iddialı komandalar var. Ancaq oyuna, komandanın perspektivinə də baxaq. Hazırda, yəni 7 turdan sonra 13 xalla “İmişli” ilə bərabərik və 4-cü pillədə yer almışıq. Amma o demək deyil ki, biz birinciliyi istəməyək. Əlbəttə, uşaqlar xarakterlidi, motivasiyalıdılar. U-21 millisində iştirak edən futbolçularımız var. Onların hər biri inkişaf etmək istəyir. Bunun üçün də çempion olmaq lazımdı. Sonuncu yeri tutsaq, necə inkişaf edə bilərik? Gənc futbolçulara desək ki, 3-cü və ya 5-ci yeri tutmalıyıq, liqadan düşməməliyik, onlar necə böyük futbola addım ata bilər?! Hər oyuna qələbə əzmi ilə çıxmasalar, Azərbaycan futbolu necə inkişaf edə bilər? Bəli, ola bilər ki, bu gün bir az qıraqdan başqa cür görünür, nəyinizlə belə iddia edirsiz və s. Biz futbolçularımıza, məşqçimizə güvənirik.

- Elita təmsilçisi "Kəpəz"in də maliyyə problemi var, "Araz-Naxçıvan"ın isə stadion. Lap premyer-liqaya çıxdız, orda davam gətirə biləcəksizmi?
- Bəli. AFFA klublara pul ayırır. Yerli futbolçularla premyer-liqaya adlaya biləcəyiksə, onda ayrılan pul bizə yetməzmi? Artıqlamasıyla bəs edəcək. Bütün işləri özümüz görməyə çalışırıq. Təsərrüfat işlərindən tutmuş, komandanın yemək-içməyi, geyimi və ya təlim-məşq toplanışı - hər şeydə bacardıqca qənaət etməyə çalışırıq. Çünki çempionat uzundu. Komandada maliyyə problemi olursa, orda heç bir keyfiyyətdən söhbət gedə bilməz.

- Bir qədər əvvəl dediz ki, mənəvi baxımdan komandanın yanındasız. Bəs maddi baxımdan nə zaman qayıdacaqsız?
- Bilirsiz, mənim klubdakı əsas işim məsələnin futbol tərəfidi. Maliyyə məsələləri arxa planda dayanır. Məsələn, mənəvi cəhətdən həmişə komandanın yanındayam. Maliyyə baxımından da həmişə əlimdən gələni etmişəm. O qədər çox olmasa da, nəyə imkanım çatıbsa, etmişəm. Formanın alınması, komandanın rayonlara gedəndə nəqliyyat xərcləri, səfər oyunlarında qalmaq üçün yerləri, yəni xırda xərcləri həmişə edirəm. Böyük xərcləri isə AFFA-nın verdiyi və iş adamlarının ayırdığı büdcə ilə ödəyirik. Birinci dövrənin sonunda məsələni müzakirə edəcəyik. İkinci dövrədə, yəqin ki, kluba əvvəlki kimi dəstək göstərərəm.

RÖYANƏ OĞUZ