“Səbail" bu gün "Sumqayıt"ı qəbul edəcək.

Oyun "kimyaçılar"ın baş məşqçi əvəzi Vaqif Cavadovun özünü sübut etməsi baxımından önəmli sınaqdı. Lakin müzakirələrin mərkəzində o yox, "dənizçilər"in çalışdırıcısı Şahin Diniyev dayanıb. Şəxsən mənə bunun səbəbi çox maraqlıdı. Düzdü, Bayıl təmsilçisinin turnir cədvəlinin 8-ci pilləsində olması bəzi tənqidi fikirlərin səsləndirilməsinə rəvac verir. Amma vəziyyət Diniyevin istefasını vacib edəcək qədər qəliz deyil.

"Səbail" bu gün haqq etdiyi yerdədimi? Məncə, hə. Səbəb Şahin Diniyevin bacarıqsızlığı, təcrübəsizliyi, hansısa məşqçi keyfiyyətlərinin çatışmamasıdımı? Məncə, yox. Qətiyyən yox!
Yeni mövsümdə büdcəsi azı üç dəfə azaldılan, aparıcı futbolçuları, xüsusilə legionerləri ayrılandan sonra, demək olar ki, tam yenilənən “Səbail” hazırda özündən yuxarı pillələrdə qərarlaşan hansı komandanı qabaqlamalıydı ki? “Dənizçilər” qol sayına görə 4-cü yeri bölüşür.

Diniyev ən qısa zamanda baxımlı oyun tərzini qələbələrlə maddiləşdirməlidi. Yoxsa sosial şəbəkələrdə, hətta bəzi media qurumlarında iddia olunduğu kimi, Şahin bəy Cavid Hüseynovla əvəzlənsə, təəccüblənməyəcəm. Bu başqa məsələ ki, vaxtilə "Cəbrayıl"ı çalışdıran, indi "Turan Tovuz"un məşqçilər korpusunda Kurban Berdıyevə yardım edən mütəxəssis premyer-liqa klubunu çalışdıracaq, özü də yüksək pillələrdə qərarlaşmasına səbəbkar olacaq səviyyədədimi? Təbii ki, yox! “Cəbrayıl”la bağlı da böyük vədlər verirdi, axırı nə oldu? Yolun yarısında komandanı atdı, Tovuza yollandı.

Görünür, yenə vəziyyət dəyişib. Deyəsən, Hüseynov "bozqurd"un ikinci pillədə qərarlaşmasını öz ayağına yazır və boyundan yuxarı tullanmağa cəhd edir. Yoxsa "Cəbrayıl"ı unudub? Bəlkə əvvəlcə yaradığı klubu premyer-liqaya yüksəltməyin planlarını cızsın? "Turan Tovuz"da təcrübə toplayıb "Cəbrayıl" üçün faydalı olmaq mümkündü. Amma hədəf "Səbail"disə və hansısa yollarla buna can atılırsa, yumşaq desək, cəbrayıllılara vaxtilə boş vədlər verilib. Doğma el-obanı təmsil edən komandadan, sadəcə, tramplin kimi istifadə olunub.

İnanmaq istəyirəm ki, Hüseynov Diniyevi əvəzləmək kimi xam xəyallarla baş qatmır və Tovuzda xoşbəxtdi.

KƏNAN BAHADIR