“Sabah” Krunoslav Renduliçlə yoları ayırdı. 7 oyundu qələbəyə üzünə həsrət qalan klubun belə addım atması gözlənilən idi. Renduliç ümidləri doğrultmadı.

51 yaşlı mütəxəssis “Sabah”a bu ilin martında gətirilmişdi. Xorvatiyal ilə 2025-ci ilin yayına qədər müqavilə imzalansa da, fəaliyyəti cəmi 265 gün çəkdi. Onun “Sabah”da debütü 2023/24 mövsümünün 27-ci turuna təsadüf edib. Martın 17-dəki qarşılaşmada Renduliçin komandası 2:1 hesablı qələbə qazanmışdı. Maraqlıdı ki, Renduliç gələndə də, gedəndə də “Sabah” 5-ci yerdə olub.

Bir çoxları “Sabah”ın tarixində ən uğurlu məşqçi kimi Murad Musayevi görür. Hansı ki, 2021-ci ilin noyabrından "Sabah"ın “sükanı arxasında” idi. Rusiyalı çalışdırıcının Azərbaycandakı fəaliyyəti 824 gün çəkdi. Komanda onun rəhbərliyi altında 87 oyun keçirib (48 qələbə, 16 heç-heçə, 23 məğlubiyyət). "Bayquşlar" ölkə çempionatının 2022/23 mövsümünü gümüş medalla başa vuraraq, tarixində ilk dəfə avrokuboklara vəsiqə qazanıb. Musayev bu ilin fevralında ardıcıl uğursuzluqlardan, xüsusən də kubokun 1/4 finalında “Qarabağ”a 1:7 hesablı məğlubiyyətdən sonra istefa vermişdi.

Məsələnin maraqlı tərəfi ondadı ki, 41 yaşlı məşqçi gedərkən “Sabah” onun oyunlarının statistikasını, nəticələrini də paylaşıb, işinə görə təşəkkür edib. Heç kim deməsin ki, xorvatiyalıya da eyni jest edilib. Renduliç üçün sadəcə, “təşəkkür” yazılıb, vəssalam. “Professor”un gedişi üçün videoçarx hazırlanmışdı. Xorvatiyalıya nə video, nə də əlavə jest...

RÖYANƏ OĞUZ