"Sabah" Murad Musayevin istefasından sonra boş qalan baş məşqçi postu üçün yeni mütəxəssislə anlaşıb.

"Football-plus.az" "sportssport.ba" nəşrinə istinadən xəbər verir ki, söhbət Krunoslav Renduliçdən gedir. O, tezliklə Bakıya gəlib Masazır təmsilçisiylə müqavilə imzalayacaq.

Qeyd edək ki, Renduliçin son klubu "Zrinjski" (Mostar, Bosniya və Hersoqovina) olub. Bu komanda 50 yaşlı xorvatiyalının rəhbərliyi altında ötən mövsüm çempion olubsa, 2023/24 "futbol ili"ndə tarixində ilk dəfə Konfrans Liqasının qrup mərhələsinə vəsiqə qazanıb. Onun kollektivdən ayrılmasının səbəbi isə çempionatdakı ardıcıl uğursuz nəticələrdi. Xal itkiləri Mostar təmsilçisinin liderlikdən üçüncü pilləyə qədər geriləməsinə səbəb olub. Ötən ilin noyabrında prinsipial rəqiblərdən "Velez"ə məğlubiyyət (0:3) klub rəhbərliyinin "səbr kasası"nı daşırıb və mütəxəssislə yolların ayrılmasına qərar verilib.

KƏNAN BAHADIR