“Beşiktaş”dan ardıcıl 2-ci qələbə - İCMAL
Avropa Liqasının əsas mərhələsində ötən tur “Qalatasaray”ın ev oyunu irəli çəkilmişdisə, bu dəfə “Beşiktaş” ev oyununu çərşənbə günü keçirdi.
İstanbul nəhəngi bizim futbolsevərlərə yaxşı tanış olan “Malmö”nü qəbul etdi. Van Bronkhorst zədəli İmmobilenin yoxluğunda hücumun mərkəzində Semih Kılıçsoya şans verdi. Gənc futbolçu bu mövsüm əsasən vinger kimi oynayırdı. Aşağı tempdə keçən ilk yarıda qonaqlar daha baxımlı təsir bağışladı.
Mərt Günok bir epizodda komandasını real qoldan xilas etdisə, Bakıda “Qarabağ”a iki qol vuran Botheym fasilə ərəfəsində yaxın məsafədən “çərçivə”yə düşə bilməyərək yaxşı fürsəti əldən verdi. “Beşiktaş” ikinci yarıya daha yaxşı başlasa da, təhlükə yenə qonaqlardan gəldi. Bu dəfə Masuaku topu qapı xəttindən uzaqlaşdırdı. Yerli fanatlar, nəhayət, 76-cı dəqiqədə ayağa qalxdılar. Son matçlarda məhsuldar oyun sərgiləyən albaniyalı Muçi Svenssonun ötürməsindən sonra topu tora göndərdi. Çox keçmədən Semih Kılıçsoy fərdi keyfiyyətləri sayəsində komandasının üstünlüyünü möhkəmləndirdi. “Malmö” layiq olduğu qolu yalnız son saniyələrdə vurdu. Amma necə deyərlər, qatar artıq getmişdi. Ötən tur səfərdə “Lion”u məğlub edən “Qartal” ardıcıl 2-ci qələbə sayəsində xalını 6-ya çatdıraraq turnir cədvəlində mövqeyini xeyli yaxşılaşdırdı.
Avropa Liqası, əsas mərhələ, 4-cü tur
Beşiktaş – Malmö (İsveç) 2:1
Muçi, 76. Semih Kılıçsoy, 85 – Rieks, 90+3.
Beşiktaş: Ərsin Destanoğlu, Svensson, Uduoxay, Əmirhan Topçu, Masuaku, Ndur, Fernandeş (Salih Uçan, 90+6), Rafa Silva, Mario (Əl Musrati, 86), Muçi (Semih Kılıçsoy, 66), İmmobile (Onur Bulut, 86).
Faktlar
* “Beşiktaş” avrokuboklarda 248-ci oyunda 94-cü qələbəsini qazandı (49 heç-heçə, 105 məğlubiyyət, top fərqi – 332:377).
* “Beşiktaş” “Malmö”yə qarşı keçirdiyi 7-ci oyunda cəmi 2-ci qələbəsini qazandı (1 heç-heçə, 4 məğlubiyyət).
* “Beşiktaş” 2016/17-dən bəri ilk dəfə AL-də ardıcıl iki qələbə qazandı.
* Van Bronkhorst məşqçi karyerasında ilk dəfə AL-də ardıcıl iki qələbəyə sevindi. Maraqlıdı ki, hətta “Reyncers” də onun başçılığı altında 2021/22-də bu turnirdə finala qədər irəlilədiyi vaxt ardıcıl 2 qələbə qazana bilməmişdi.
Oyundan sonra
Covanni van Bronkhorst, “Beşiktaş”ın baş məşqçisi:
“Hər baxımdan çox dəyərli 3 xal qazandıq. İlk iki oyundakı məğlubiyyətlərə lazımi reaksiya verdik. Son iki oyunda 6 xal qazanmağımız bunu bir daha göstərir. Oyunçularımla qürur duyuram. Oyunun ən həlledici məqamlarında canavar kimi müdafiə olundular. Tempimiz və aqressivliyimiz məni qane etdi. Amma çalışmalıyıq ki, sabit oynayaq. Ötən şənbə günü superliqada sərgilədiyimiz futbolla bugünkü futbol arasında böyük fərq var. Bu mövsüm komandaya bir çox yeni oyunçu gəlib. Onlar uyğunlaşma dönəmini hələ başa vurmayıb. Bu gün bir çox futbolçu yaxşı oynadı və ümidlərimi doğrultdu. Maksimum səviyyələrinə yaxın futbol sərgilədilər. Belə oynadıqda qələbə qazanmaq da asanlaşır. “Makkabi”yə qarşı növbəti oyunu evdə keçirə bilməyəcəyik. Bu, bizim əleyhimizə olan məqamdı. Amma qalib gəlib xalımızı 9-a yüksəltməyə çalışacağıq. Hər növbəti qələbə bizi pley-offa bir qədər də yaxınlaşdırır. Rəqib məşqçi nəticənin ədalətli olmadığını düşünür? Bəli, onların da fürsətləri oldu. Amma futbolda elə günlər olur ki, istədiyini ala bilmirsən”.
Henrik Ridström, “Malmö”nün baş məşqçisi:
“Yaxşı fürsətlər yaxaladıq. Məğlubiyyətə layiq deyildik. Sadəcə, bizdən fərqli “Beşiktaş” əlinə düşən fürsətləri qola çevirdi. Həm də ilk qolu buraxandan sonra bir qədər həvəsdən düşdük. Bunu oyunumuzdan da hiss etmək olardı. Sona qədər də toparlana bilmədik. Amma 90 dəqiqəlik mübarizəyə baxsaq, biz qələbəyə daha yaxın tərəf idik”.
