Başa çatan həftə ilə bağlı maraqlı tendensiya var.

İspaniyalı hakimlər ardıcıl ikinci dəfə Çempionlar Liqası, Avropa Liqası və Konfrans Liqasının oyunlarına təyinat almadı. UEFA-nın Hakimlər Komitəsi bu ölkədən olan referiləri cəzalandırmağı lazım bilib. Oktyabrın 22-24-ü aralığında qitə kubokları çərçivəsində keçirilən oyunlarda da belə olmuşdu.
Belə sərt cəzanın çox sadə səbəbi var – UEFA-nın Hakimlər Komitəsinin sərdi Roberto Rozetti “Relevo” nəşrinə sızan informasiyanın əvəzini bu yolla çıxmaq istəyir.

Adı çəkilən nəşr sentyabrda UEFA-nın AÇ-2024-də keçirilən İspaniya – Almaniya (2:1) oyununu idarə edən Entoni Teylorun Mark Kukurelyanın əllə oynamasına görə penalti nöqtəsini göstərməməsinin səhv olduğunu etiraf etdiyini yazmışdı. Əslində söhbət səhvdən getmirdi. Hakimlər Komitəsi, sadəcə, qalmaqala reaksiya vermiş və avrokubokların 2024/25 mövsümündən etibarən əllə oyunla bağlı tətbiq olunan yeni təfsiri açıqlamışdı.

Yeni təfsirdə deyilir ki, qapıya zərbə zamanı əllə topun təması halında sərt cəza vermək, penalti təyin etmək lazımdı. Müdafiəçinin əlinin bədənə çox yaxın olduğu və ya bədənə sıxıldığı hallar istisna olmaqla. Kukurelyanın epizodunda əl bədənə o qədər də yaxın deyildi. Belədə bədən həcmi artır, yəni yeni təlimata əsaslansaq, mütləq penalti təyin olunur.
İş ondadı ki, avrokubokların yeni mövsümünün startı ərəfəsində UEFA Hakimlər Komitəsi oyunlarda iş başında olacaq hakimlərə və inspektorlara yeni tövsiyələri çatdırıb. Bu hadisə sentyabrda, yəni Çempionlar Liqası start götürməmiş baş verib. İspaniyalı hakimlərdən hansısa bu dəyişiklikdən jurnalistləri xəbərdar edib.

İspaniyalıları penalti ilə cəzalandırmayan Teylor isə iyulda düzgün qərar vermişdi. O, həmin vaxt mövcud olan təlimata əsaslanıb, yəni Kukurelyanın əlinin təbii vəziyyətdə olduğunu düşünüb. Bu üzdən penalti nöqtəsini göstərmək üçün əsas tapmayıb. Daha bir məqam var: onsuz da Almaniya yığması həmin epizodda penaltiyə iddia edə bilməzdi. Ona görə ki, Camal Musialanın məlum zərbəsindən saniyələr əvvəl Niklas Füllkruq ofsayda düşmüşdü. Həmin oyunda VAR hakimi kimi Teylora yardım edən həmvətəni Stüart Attuell almanların hücumunun gedişində bir neçə epizodu dəyərləndirməli oldu.
İspaniya mediası həqiqətən də UEFA-nın yeni təlimatını yayıb. Həm də özünəməxsus şəkildə şərh etməklə. Ancaq belə informasiya istənilən halda uzun müddət gizli saxlanıla bilməz, bir halda ki, yüzlərlə hakim və inspektor ondan xəbərdar idi. Bu təlimatı sirr kimi saxlamağın əhəmiyyətini anladan yoxdu. UEFA əslində rəsmi səviyyədə bununla bağlı açıqlama verməli, futbol ictimaiyyətinə əllə oyunun təfsirinin dəyişdiyini anlatmalıydı.

Görəsən, Rozettinin yeniliyi dövlət sirri kimi qorumasının mənası nədi? Havadan asılı qalan bu sual öz yerində. Başqa bir maraqlı məqam isə odu ki, bir nəfərə görə İspaniyanın bütün hakimləri cəzalandırılır ki, bunu da sağlam məntiqlə izah etmək çətindi. Ya da bəlkə söhbət təkcə “Kukurelya əli” ilə bağlı deyil, UEFA ilə ispaniyalı hakimlər arasında bilmədiyimiz hansısa başqa qalmaqal da var?