350 min adam İspaniya – Almaniya oyununun yenidən keçirilməsini istəyir
Change.org saytında yeni petisiya açılıb. Petisiyanın yaradıcıları UEFA-dan Avropa çempionatının 1/4 final mərhələsinin iyulun 5-də keçirilən İspaniya – Almaniya oyununun (2:1) yenidən təşkilini tələb edirlər.
Erik V adlı müəllif bu tələbi ingiltərəli referi Antoni Teylorun hakimlər briqadasının işi ilə izah edir. Onun fikrincə, hakim oyunun axarına təsir göstərən bir neçə kobud səhvə yol verib. Petisiyanın tam mətni belədi:
“106-cı dəqiqədə İspaniya yığmasının qapısına təmiz penalti təyin olunmayıb. Onda Mark Kukurelya önə çıxan əli ilə Musialanın qol vurmasının qarşısını aldı. Referi Entoni Teylor oyunu davam etdirdi, VAR isə anlaşılmaz səbəbdən epizoda müdaxilə etmədi. Ancaq bu, çoxlu düzgün olmayan qərardan yalnız biri idi. 77-ci dəqiqədə Naço Niklas Füllkruqun Florian Virtsin asmasını tamamlamasına mane oldu – ispaniyalı rəqibi yıxılmağa məcbur etdi və onun hücumu bitirməsinə imkan vermədi. Yuxarıda xatırladılan iki qeyri-düzgün qərar həlledici oldu və oyunu dəyişdi. Bu üzdən hesab edirəm ki, oyun yenidən keçirilməlidi. Siz də bu fikri dəstəkləyirsizsə, lütfən, bu petisiyanı imzalayın və dostlarınıza xəbər edin”.
İyulun 5-də açılan petisiyanı iki gün ərzində 350 min adam imzalayıb. Yaxşı, doğrudanmı Teylor səhvə yol verib?
Topun Kukurelyanın əlin dəyməsi gerçəkdən böyük əks-səda doğurdu. Ancaq rəsmi şəxslərdən heç biri bu qərarın səhv olduğunu demədi. Hələ üstəlik “The Athletic” yazır ki, qitə futbol qurumu Teylorun penalti təyin etməmək qərarından razı qalıb:
“UEFA hesab edir ki, hakim doğru qərar verib. Ona görə ki, turnirdən əvvəl dərc olunan hakimlikliklə bağlı tövsiyələrə əsasən, zərbə anında Kukurelyanın əli qeyri-təbii vəziyyətdə olmayıb”.
Hələ iyunun 12-də, yəni turnirin startı ərəfəsində UEFA hakimlər komitəsinin rəhbəri Roberto Rozetti müxtəlif oyun epizodlarının təfsiri ilə bağlı ətraflı danışmış, videoçarxlar göstərmişdi. Onun göstərdiyi epizodlar arasında İspaniya – Almaniya oyununun 106-cı dəqiqəsində yaşananların da oxşarı var idi. Rozetti demişdi ki, belə vəziyyətlərdə penalti təyin olunmur – müdafiəçinin əli təbii vəziyyətdədi, bədənlə paralel dayanıb, bilək aşağı baxır, topa qəsdən toxunma yoxdu.
Oxucuda daha bir sual yarana bilər: oyunun yenidən təşkili mümkündümü? Birmənalı şəkildə yox. Hətta Teylorun səhvindən söhbət getsəydi belə, yenə heç nə dəyişməyəcəkdi. Futbol üzrə Avropa çempionatının reqlamentində hakimlərin keyfiyyətsiz işi üzündən oyunun yenidən keçirilməsinin mümkünlüyü ilə bağlı bircə söz də yoxdu. Yəni 350 min yox, lap 350 milyon imza toplasalar da, UEFA mövqeyini dəyişən deyil.
Xatırladaq ki, İspaniya və Fransa yığmaları arasındakı yarımfinal oyunu bu gün Münhendə keçiriləcək.
Digər xəbərlər
