"Kəpəz" 10-cu yeri tərk edə bilməsə də, son beş oyunda 7 xal toplamaqla ciddi irəliləyişə nail olub. İndi Gəncə təmsilçisi "Səbail"dən bir xal geridədi. Deməli, hər oyun 9-cu pilləyə yüksəlmək, premyer-liqanı tərk etmək təhlükəsindən az da olsa, uzaqlaşmaq üçün yeni fürsətdi.

"Football-plus.az" bu ərəfədə "sarı-göylər"in kapitanı, Belarus millisinin sabiq üzvü, kollektivlə birgə üçüncü mövsümünü yaşayan Yeqor Xvalkoyla söhbətləşməyə ehtiyac duydu. Təbii ki, fürsətdən istifadə edib futbolçunu bir qədər yaxından tanımağa çalışmasaq, nəsə əskik olardı.

- "Sabah" həm heyətinə, həm də büdcəsinə görə premyer-liqanın iddialıları sırasındadı. Belə komandanın meydanından bir xalla ayrıldız. Nəticə düşərgədəki ab-havaya necə təsir etdi?
- Bizim üçün hər şey yaxşıya doğru gedir. Oyunlar geridə qaldıqca xallar qazanırıq. Yavaş-yavaş özümüzə gəlirik. İnanıram ki, daha yaxşı yerlərdə olacağıq.

- Sonuncu qarşılaşmayla bağlı düşüncələrin maraqlıdı...
- Məncə, bir xala layiq idik. Bəlkə də çox möhtəşəm oyun göstərə bilmədik. Amma bu xalı qazanmaq üçün mübarizə apardıq. Meydanda əvvəldən sona qədər döyüşdük. 90-cı dəqiqədə vurulan qol da bunun sübutudu.

- Bəli, "Kəpəz"in xal ehtiyatı artır. Belə çətin dövrdə gəncəli azarkeşlərin dəstəyini hiss edirsizmi?
- Tam səmimi deyim ki, onların tribunada daha çox olmasını istərdim. Təəssüf ki, ev oyunlarını Gəncədə keçirmirik. Məncə, evimizdə meydana çıxsaq, daha çox azarkeş yanımızda olacaq.

- Səncə, “Kəpəz”in böyük hədəflər uğrunda mübarizə aparmasına nə mane olur?
- Hamı başa düşür ki, müasir futbolda maliyyə böyük rol oynayır. Bildiyiniz kimi, "Kəpəz"in sponsoru yoxdu. Həmçinin əksər futbolçular Bakıda oynayan komandaları seçir. Onları Gəncəyə gətirmək üçün çox səy göstərmək lazımdı.

- Sponsor demişkən, "Kəpəz"in maliyyə gücü çox deyil. Burda üçüncü mövsümünü keçirirsən. Səni "sarı-göylər"ə nə bağlayır?
- Bilmirəm (gülür). Görünür, bu komandanı həddən artıq çox sevirəm... Nə bilim... Özümü burada rahat hiss edirəm. Hamı mənə hörmətlə yanaşır.

- Geridə qalan vaxt ərzində bir neçə baş məşqçi ilə çalışmısan. Sənin üçün ən yaddaqalan mütəxəssis hansı olub?
- Hamısı (düşünür). Həqiqətən hər biri karyeramda iz qoyub. Hamısına hörmətim var. Kimisə fərqləndirməyi düzgün saymıram.

- Səncə, Azər Bağırov nəyisə dəyişə bilibmi?
- Mövsümün əvvəlindən indiyə qədər həm baş məşqçimiz, həm də heyətimiz dəyişdi. Görürəm ki, ciddi yeniliklər var. Başverənlər məni ümidləndirir.

- Premyer-liqada qalmaq uğrunda mübarizə sona kimi yalnız “Kəpəz”lə “Səbail” arasında gedə bilər. Sən necə düşünürsən?
- Bu fikirlə razı deyiləm. Hiss edirəm ki, daha çox xallar əldə edib yuxarı pillələrdəki komandalara çatacağıq və mübarizədə ancaq bu iki kollektiv olmayacaq.

- Ən çətin oyunlarını hansı rəqiblərə qarşı keçirdiyini düşünürsən?
- Məncə, ən çətin oyunlar "Turan Tovuz"la olub. Bu komandanın xüsusi üslubu var.

- Amma ən böyükhesablı məğlubiyyətlərinizi "Qarabağ"dan almısız...
- Elədi. Həmişə demişəm ki, bu çempionatda “Qarabağ”dan başqa istənilən rəqibdən xal və ya xallar almaq olar. "Qarabağ" başqa səviyyədədi.

- Meydanda ən böyük məsuliyyət sənin üzərindədi. Bazübəndi taxan futbolçunun komanda yoldaşlarıyla münasibətindən meydandakı performansına qədər hər şey diqqəti çəkir. Bu barədə son durum necədi?
- Hamıyla dost olduğumu deməzdim. Amma bütün komanda yoldaşlarımla münasibətim yaxşıdı. Sadəcə, bəziləri ilə az, bəziləriylə çox ünsiyyət qururam. Onların hər biri daim birlikdə olduğum şəxslərdi. Hamısına dəyər verirəm.

- Hansı komandaya azarkeşlik edirsən?
- Madrid "Real"ını çox bəyənirəm.

- Belarus millisindən uzaq düşmüsən...
- Təəssüf ki, elədi... Görünür, komandası sonuncu pillədə olan futbolçunun milli forma geyməsində heç kim maraqlı deyil. O başqa məsələ ki, "Kəpəz"in autsayder olması həm də mənim günahımdı...

- Düzdü, xoş təsəlli deyil. Lakin bu o deməkdi ki, fasilədə istirahət etmək imkanın olacaq.
- Çox qısa... Dərhal işə qayıtmalıyıq. Çünki oyunumuzu yaxşılaşdırmalı, xallar qazana bilmək üçün güc toplamalıyıq. Bunun üçün maksimum dərəcədə çalışmaq lazımdı.

KƏNAN BAHADIR