Misli premyer-liqasında 1-ci turun oyunları davam edir.

“Football-plus.az” xəbər verir ki, “Kəpəz” “Neftçi”ni məğlub edib - 1:0. Matçdan sonra gəncəlilərin çalışdırıcısı Azər Məmmədovun mətbuat konfransı keçirilib. Sizi mütəxəssisin fikirləri ilə tanış edirik:

- Demişdiz ki, ən böyük arzum "Kəpəz"in baş məşqçisi olmaqdı. Bu arzunuz reallaşdı. Bundan sonra hədəfiniz nədi?
- "Kəpəz"in baş məşqçisi olmaq adi bir şey deyil. Sevinirəm ki, burdayam. Hələ böyük iş görməmişik. Bundan sonra 35 oyun var. Çempionat uzun marafondu. Ağrılı, sevincli günlərimiz olacaq. "Neftçi"ni udsaq da, böyük bir iş görməmişik. Dayanmamalıyıq.

- Konkret olaraq danışıq apardığınız futbolçular var?
- Çox futbolçu ilə danışırıq. Köhnə Yuqoslaviyadan, Niderlanddan olan oyunçularla danışıqlar gedir. Gəncə böyük şəhər olsa da, bura region kimi baxırlar. Çoxu Bakını istəyir. Maliyyə gücümüz də o qədər çox deyil. Bakıya 5-ə gəlirlərsə, bizdən daha artığını istəyirlər. Bəzilərinin ailəsi bura gəlməyə razılaşmır. Amma çalışırıq ki, yaxın zamanda ən azı üç transfer edək. Hələ ki, heç kimlə razılaşmamışıq.

- Zamiq Əliyev və Bəxtiyar Həsənalızadə komandanı tərk etdi. Bəxtiyarın müqaviləsində belə bənd var idi ki, xaricdən təklif gəlsə, gedə bilər. Başqa hansı futbolçunun sözləşməsində belə bənd var?
- Bəxtiyar milli üzvüdü, yaxşı, artıq maaş istəyirdi. Onunla "Zirə"də işlədiyim vaxtdan tanışıq. Mənə görə "Kəpəz"də oynamağa razılıq vermişdi. Xahiş etdi müqaviləyə bənd salaq ki, xaricdən təklif gəlsə, gedişinə icazə verilsin. Bu, təbii haldı. Təklif oldu və həmin bənddən yararlandı. Başqa futbolçuların müqaviləsində belə bənd yoxdu.

- Hamı "Kəpəz" və "Araz Naxçıvan"a autsayder kimi yanaşırdı. Bu qələbədən sonra rəqiblər sizə daha ciddi yanaşacaq?
- Razıyam ki, "Kəpəz"i autsayder hesab edirlər. Bu oyundan sonra bizi sayacaqlar. Amma rəqiblər "Kəpəz"ə həmişə ciddi yanaşıblar. Bu gündən sonra isə daha ciddi hesab edəcəklər. "Neftçi" üç gün əvvəl ağır oyun oynamışdı. Fürsətdən istifadə edib onları məğlub edə bildik. Bundan sonra bizim üçün ağır olacaq.

- İddialar var idi ki, "Neftçi" bu matçın Bakıda keçirilməsini istəyib və "Kəpəz" razı olmayıb. Həqiqətən belə olub?
- Tam olaraq yox. Ümumi olaraq, söhbət etmişdik.