Premyer-liqanın aşkar autsayderi “Kəpəz” Masazırda 1 xala sevindi. 13-cü turda “Sabah”ın qonağı olan gəncəlilər 2:2 hesablı bərabərliklə hesabına daha 1 xal yazdı.

“Football-plus.az” oyundan sonra komandanın yarımmüdafiəçi Orxan Əliyevlə söhbətləşdi.

- “Sabah”dan səfərdə bir xal aldız. Hesab ədalətliydimi?
- Əslində oyun ağır keçdi. Bilirdik ki, “Sabah” yaxşı komandadı. Birinci hissədə yaxşı oynadıq, çox hücum etdik. Gərgin mübarizə keçdi. Məncə, heç-heçə ədalətli nəticədi.

– Komandanı erkən qolla sevindirsən də, sonra avtoqol vurdun. Qələbə qolunu vurmağa nə mane oldu?
- Əlbəttə, qələbə qazanmaq istəyirdik. Komanda da, mən də buna inanırdıq. Sadəcə, futboldu, rəqib də bizim kimi qələbə istəyirdi. Hesab edirəm ki, heç-heçə indiki vəziyyətdə ən yaxşı nəticədi.

– Çox adam gözləyirdi ki, növbəti komandanı məğlub edərək baş məşqçini istefaya göndərəsiz...
– Bu haqda nəsə demək düzgün olmaz. Biz uda da bilərdik, uduza da. Amma bərabər oynadıq. Oyun belə deməyə əsas verir. Həm də bizdə də, onlarda da arxayınlıqlar olurdu.

– Xal qazandıqca komandada ab-hava da dəyişirmi? Baş məşqçi Azər Bağırov paltardəyişmə otağında nə dedi?
– Əlbəttə. Özünüz görürsüz, paltardəyişmə otağında necə şənlik var. Azər müəllim dedi ki, çətin olsa da, yaxşı performans göstərdiz. Uda da bilərdiz, amma bəzən olmur. Buna da şükür.

– “Kəpəz” qış fasiləsinə qədər nə etməyi düşünür?
– Xal qazanmağı. Çətin vəziyyətdə olduğumuzu bilirik. Buna baxmayaraq, vuruşsaq, rahat irəli gedə bilərik. Mən “Kəpəz” i sonuncu yerə layiq görmürəm. Daha yuxarı pillələrdə olmalıdı. İnanıram ki, belə də olacaq.

– “Neftçi”, “Sabah” və “Səbail”dən xal aldız. Onlar sizi ciddiyə almır, yoxsa siz yavaş-yavaş toparlanırsız?
– Hər oyuna qələbə üçün çıxırıq. Bilirik ki, komandalar güclüdü. Əksinə, belə klublara qarşı oynamaq bizə motivasiya verir. Belə komandalardan xal almaq indiki vəziyyətdə böyük işdi.

– Mövsümün əvvəlində komandaya qoşuldun. “Kəpəz”ə tam öyrəşmisən, yoxsa fasilədə başqa təklifləri dəyərləndirə bilərsən?
– Bura öyrəşmişəm. Uşaqların hamısını da tanıyıram. Bir-birimizi məşqlərda də görürük. Kimisə ayrıca demək istəmirəm, hamımız birik. Bu işi bir yerdə görürük. Çalışırıq ki, komandamızı bu vəziyyətdsn çıxaraq. Təkliflər barədə danışmaq istəmirəm.

– “Araz-Naxçıvan”da komandanın vuran ayağı idin, hətta bombardirlər siyasında adın da vardı. İndi sənə bunun üçün nə mane olur?
– Əlbəttə, öz üzərimdə işləyirəm. Çalışıram hər oyunda qol vurum. Fərqi yoxdu. İstəyirəm daha çox qollar vurub milliyə dəvət alım. Azərbaycan millisində, yəni öz yığmamızda forma geymək istəyirəm.

RÖYANƏ OĞUZ