Bu gün "Sabah" "Kəpəz"i qəbul edəcək axı...

Yəqin ki, buna "bayquşlar"ın baş məşqçisi Krunoslav Renduliç qədər sevinən yoxdu. O, maddi çətinliklər yaşayan, bu azmış kimi, mövsümlərarası fasilədə yalnış transfer seçimləriylə formalaşdırılan komandanı məğlub etməklə dörd oyunluq qələbə həsrətini sona çatdırmaq niyyətindədi. Utanmır e...

Renduliçin utanc hissini itirdiyi haqda fikrim bu gün dəqiqləşməyib. Sözlərini tutmaqda aciz qaldığını müşahidə edəndə anladım ki, "Sabah" sabahını yalnız bugünü düşünən birinə əmanət edib. Xorvatiyalı premyer-liqanın birinci dövrənin son oyunundan sonra keçirilən mətbuat konfransında etiraf etdi ki, xal ehtiyatı hədəfləndiyi qədər artırılmayıb. Azarkeşlərə ümid verməyi də unutmadı: "ikinci dövrədə daha çox xal toplamağa çalışacıq". Bu yerdə xatırladım ki, "Sabah" son 3 üç oyunda iki xal toplayıb...
Komanda evdə "Neftçi"ylə heç-heçə etdikdən sonra Renduliçin hələ qış fasiləsindən sonrasını düşünmədiyi, növbəti matça kökləndiyi bəlli oldu. O oyun ki, "bayquşlar" "Sumqayıt"a uduzdu.

Bəs Renduliç niyə utanmalıdı? Buna gərək varmı? Büdcəsinə görə liderlər sırasında qərarlaşan, heyəti çempionluq uğrunda mübarizə aparacaq keyfiyyətlərə malik olan kollektiv avrokuboklar uğrunda döyüşən komandalara qalib gələ bilmirsə, qələbəsizlik seriyasına son qoymaq üçün autsayderlə oyuna göz dikirsə, azarkeşlərə verdiyi sözü tutmaqda çətinlik çəkirsə, müdafiə xəttindəki problemləri aradan qaldıracağını deyib hücumdakı məhsuldarlığı da "qurudursa", utanmalıdı. Belə vəziyyəti özünə sığışdırmamalıdı. O özü isə nəinki "Sabah"ın baş məşqçi postuna sığışır, bu vəzifə onun əyninə çox genişdi!

KƏNAN BAHADIR