Mövsüm başlamamış hər çempionatda olduğu kimi, Misli premyer-liqasında da hansı komandaların favorit ola biləcəyi ilə bağlı mülahizə yürüdənlər çox olur.

Əlbəttə, bizdə “Qarabağ”, “Neftçi” və “Sabah” çempionluğa əsas namizəd kimi görünürdü. Xüsusən də “Sabah”ın ötən mövsüm “Qarabağ”a ciddi müqavimət göstərməsi, yayda avrokubok oyunlarında xoş təsir bağışlaması komandanın bu mövsüm çempion ola biləcəyini deyənlərin sayını artırmışdı. Bunun başlıca səbəblərindən biri “El Professor” ləqəbini qazanmış Murad Musayevin oyun zəkası, klubun maliyyə problemlərinin olmaması, yüksək keyfiyyətli yerlilərin və legionerlərin varlığı idi. Amma mövsüm başlayan kimi miflər dağıldı. “Sabah” birinci dövrədə ümidləri doğrultmadı. “Tələbələr” ilk dövrənin, sadəcə, 3 matçından qalib ayrılıb, 4 oyunda heç-heçə etdi, 5 məğlubiyyətlə yadda qaldı. Bunu komandaya yeni transfer edilən futbolçuların uyğunlaşma problemi ilə əlaqələndirsələr də, ikinci dövrədə də gözlənilən performansı görmədik. Artıq komandanı nəinki çempion edə bilməyəcəyini, hətta hədəflərindən tam uzaq saldığını anlayan Murad Musayev istefa verdi. Belədə “tələbələr” 21-25-ci turlar aralığında meydana İqor Ponomaryovun rəhbərlik etdiyi, Ruslan Qafitullinlə Rəşad Eyyubovun da yer aldığı məşqçilər korpusu tərəfindən çıxarıldı. Komanda 5 oyunun 2-də qalib gəldi, 2-də heç-heçə etdi və 1 dəfə də məğlubiyyətlə başa vurdu. Xorvatiyalı mütəxəssis Krunoslav Renduliç baş məşqçi təyin olunandan sonra çıxdığı 3 matçın 2-də qalib gəlməyi bacaran komanda 1 oyunda məğlub oldu.

Beləliklə, mövsümün əvvəlindən bəri “Sabah”da dəyişikliklər bitmir. Bu komandanı başqalarından fərqləndirən cəhət həm də heyətin zəngin, baş məşqçilərin seçim imkanının geniş olmasıdı. Ponomaryovun və köməkçilərinin rəhbərlik etdiyi “Sabah”la Musayevlə Renduliçin idarə etdiyi “Sabah” arasında önəmli fərq var. Belə ki, Ponomaryov əsas qapıçı kimi Yusif İmanovdan, digər çalışdırıcılar isə Nicat Mehbalıyevdən yararlanıb. Əsasən də Renduliçin gəlişindən bəri qapını Mehbalıyevə tapşırılıb. Xorvatiyalı çalışdırıcının əsas qol silahı kimi Kahim Parrislə Cesse Sekidikadan istifadə etməsi, İshak Belfodili sonradan meydana buraxması da diqqətdən yayınmır. Hər çalışdırıcının oyun üslubunun fərqli olduğu bəllidi. Sadəcə, xırda nüansları xatırlamaqda fayda var. “Sabah” Renduliçin rəhbərliyi altında hələ ki üç rəsmi matça çıxıb. İndidən onun haqqında fikir yürütmək tezdi. Sadəcə, komandanın bu üç oyundakı üslubunu müəyyənləşdirmək çətinlik yaradır. Komanda bir oyunda yaxşı səviyyədə mübarizə aparırsa, digərində meydanda yorğun görünür. Bunun səbəbini, hər halda, məşqçilər korpusu daha yaxşı təhlil edib nəticə çıxaracaq. Elə “Zirə” ilə sonuncu görüşdə bunu aşkar şəkildə görmək mümkün idi. Hazırda koamnda turnir cədvəlinin 5-ci pilləsində yer alıb. Qarşıda isə 8 tur var. “Sabah” heyətinə və başqa parametrlərə görə ikinci yerə ən real namizədlərdən biridi. Və mövsümün sonunda avrokuboklara vəsiqə qazanılmasa, heç şübhəsiz, Renduliç məşhər ayağına çəkiləcək. Bu başqa məsələ ki, elə bir haqq-hesab günü yetişərsə, müttəhimlər kürsüsündə Murad Musayevlə İqor Ponomaryov da oturmalıdı.

KAMAL SƏFƏR