Bu gün Misli premyer-liqasında 3-cü tura yekun vurulur.

Bilindiyi kimi, Zirə İdman Kompleksinin stadionunda keçiriləcək oyunda "Neftçi" "Sabah"ı qəbul edəcək. "Ağ-qaralar"la bağlı məsələ aydındı. Roman Qriqorçukun çalışdırdığı komanda özünə gəlməyə çalışır. Əlbəttə, mütəxəssis bu vəzifəyə yeni təyin olunduğundan müəyyən vaxta ehtiyac var. Belədə üzümüzü nəinki diqqəti çəkən, səhvlərlə yadda qalan Krunoslav Renduliçə tuturuq.

Yazının baş rol ifaçısı ölkəmizə bir neçə ay əvvəl gəlsə də, hər kəsə tanışdı. Onu ötən mövsümün sonunda qazandığı uğurlar sayəsində tanıyırdıqsa, indi "sükan"ı saxlamaqda çətinlik çəkir. Ona görə ki, 2023/24 "futbol ili"nin sonlarında turnir cədvəlinin aşağı pillələrində qərarlaşan "bayquşlar"a qısa müddətdə "can verən" xorvatiyalı komandanı avrokuboklara daşıdı. Amma çoxu mütəxəssisin Avropa meydanlarında belə biabırçı obrazla yadda qalacağını təxmin etmirdi. Axı heyət konkret gücləndirilmiş, ardından "Makkabi" səfərdə darmadağın edilmişdi. Sonrası bəllidi. "Sent Patriks" kimi istənilən cəhətdən zəif komandaya bir qol belə vurulmadı, kobud qayda pozuntuları qırmızı vərəqərlərlə nəticələndi və pley-off imkanı əldən çıxdı.

Evdə keçirilən cavab oyunundan sonra jurnalistlərin önünə çıxan Renduliç dedi-güldü, zarafatlaşdı və sağollaşdı. Bizlə deyirəm, komanda ilə yox. Halbuki belə zəif komandaya hər iki oyunda uduzduğuna görə üzr istəməli, üzgün görünməli və özünə başqa klubda iş tapmaq üçün yola düşməliydi. Əksinə, "Sabah"ın yeni yarandığını, hələ cəmi ikinci dəfə avrokuboklarda iştirak etdiyini, iki ildi Konfrans Liqasına vəsiqə qazandıqlarını fiaskosuna qalxan etdi. Bahalı və zəngin heyətinə, klubun məlum böyük büdcəsinə, minlərlə azarkeşin üzüntüsünə, "Sent Patriks" kimi keçiləsi rəqibə uduzduğuna, "Şamaxı"nın birbaşa 1-ci liqadan Masazıra gəlib 1 xal qoparmasına və evdə "Zirə"yə məğlub olmasına (0:2), ümumiyyətlə, son 6 rəsmi matçda cəmi 1 qələbəyə görə utanmadı.
İndi "Sabah" "Neftçi" ilə üz-üzədi. Renduliçin isə qələbədən başqa yolu yoxdu. Onsuz da "bayquşlar"ın psixoloji cəhətdən zəif olduğunu bilirik. Növbəti məğlubiyyət onların "qara zolağ"ını daha uzun edə bilər.

KƏNAN BAHADIR