Çempionlar Liqasında əsas mərhələnin 4-cü turunun ilk oyun günündə bir sıra gözlənilməz nəticələr qeydə alındı.

Onlardan biri ''Real''ın doğma meydanda ''Milan''a uduzması oldu. ''Kral klubu'' zəif təsir bağışlayaraq 1:3 hesabı ilə məğlub oldu. Özü də Andrey Lunin buraxdığı qollardan başqa dəfələrlə komandasını xilas etdi. Yoxsa, fərq daha böyük ola bilərdi. Karlo Ançelotti komanda şəklində yaxşı oynamadıqlarını və bu vəziyyətdən çıxış yolu tapmalı olduqlarını dedi. Son ev oyununda La Liqada ''Barselona''ya 0:4 hesabı ilə uduzan ''Real'' son 15 ildə ilk dəfə öz meydanında ardıcıl iki qarşılaşmada ən azı 3 top buraxaraq məğlub oldu. Bu hal sonuncu dəfə 2009-cu ildə baş vermişdi. O vaxt Madrid nəhəngi evdə əvvəlcə ''Barselona''ya 2:6, sonra da ''Malyorka''ya 1:3 uduzmuşdu.

Onu da bildirək ki, ''Milan'' ''Bernabeu''nu fəth etməklə ''Real'' ilə şəxsi oyunlarda qələbə sayında önə keçdi (7:6)!

ƏLİ