“Təəssüf ki, UEFA belə oyuna şotlandiyalı referini təyin etmişdi”
Fariz Yusifov Uolşun bütün qərarlarını düzgün saydı, penaltidən başqa
“Qarabağ” – “Ayaks” oyununu idarə edən Nikolas Uolşun qərarları birmənalı qarşılanmadı. Daha doğrusu, ağdamlıların darmadağın olmasını şotlandiyalı referinin qərəzli qərarları ilə bağlayanların da sayı çoxdu. Odu ki, daimi ekspertimiz Fariz Yusifovdan ən çox mübahisə doğuran qərarlara münasibət bildirməsini istədik.
3-cü dəqiqə. Cəfərquliyev sol cinahdan qapı önünə ötürmə verdi, müdafiəçiləri qabaqlayan Andrade yaxın məsafədən topu tora gəndərdi. Uolş “ofsayd” dedi, VAR da bu qərarı təsdiqlədi.
Yusifovun izahatı:
“Orda açıq-aşkar görünürdü ki, Cəfərquliyev öndədi, heç VAR-a baxmağa ehtiyac yox idi. Bir balaca ləngisəydi, heç bir oyundankənar vəziyyət olmazdı”.
15-ci dəqiqə. Künc zərbəsinin ardından Medina topu rəqibə vurdu. Qonaqların sürətli əks-hücumu zamanı Qodts qapıçı ilə təkbətək çıxmaq istəsə də, Romao onu yerə sərdi. Hakim epizodu “sonuncu ümid folu” kimi dəyərləndirdi.
Yusifovun izahatı:
“Belə məqamda futbolçular bir balaca düşünməlidi. Top sənin nəzarətində ola-ola, niyə korpus qoymaq istəyirsən? Rəqibin qarşısını qapıdan 50-55 metr aralıda kəsirsən. Romao ayaqla oynasaydı, qapıçıya ötürmə versəydi və ya topu sağa-sola vursaydı, heç bir problem olmadı. Romao rəqibi davamlı tutub saxlayırdı. Nəticədə "qırmızı" çıxdı”.
36-cı dəqiqə. Teylor Yankoviçlə mübarizədə topu ələ keçirir. Qodts topu Veqhorsta, o da qapının uzaq küncünə tərəf ötürür, Teylor hesabı açır. “Qarabağ”ın oyunçuları hücumun əvvəlində qaydanın pozulduğunu iddia edir.
Yusifovun izahatı:
“Teylor Yankoviçdən, Yankoviç də Teylordan tutmuşdu. Belə epizodda şəxsən mənim üçün qərar vermək çətindi. Ancaq hakim meydan sahiblərinin azlıqda qaldığını da nəzərə alıb, “Qarabağ”ın xeyrinə qərar verə bilərdi. Vermədi”.
72-ci dəqiqə. Zubirdən topu “oğurlayan” Henderson Rasmusseni cərimə meydançasına göndərir. Danimarkalı hücumçu Medina ilə mübarizədə yerdə qalır. Uolş tərəddüd etmədən “nöqtə”ni göstərir.
Yusifovun izahatı:
“Medianın hərəkətində kobudluq görmədim. Çünki müdafiəçi kimi hücumçunun qarşısını almaq üçün hərəkətlər etdi. Bəli, orda çiyin mübarizəsi oldu. Deyə bilərsiz ki, Rasmussenin ayağına da toxunuş var idi. Amma elə bir ciddi səbəb deyildi. Uolş belə epizoda görə Şotlandiya çempionatında penalti versə, onu orda qəbul edərlər, ya yox? Çox qətiyyətli qərar idi. Düzdü, Rasmussen yıxılanda ayağından tutdu. Gördüz ki, meydana həkim də daxil olmadı. Çünki mübarizə zamanı belə məqamlar yaşanır. Ayağa toxunuş olsa da, kobudluq dərəcəsində deyildi”.
Yekun nəticə:
“Uolş 2018-ci ildən hakimliyə başlayıb. Ümumiyyətlə, fəaliyyət illərinə baxanda görmək olar ki, vərəqəyə çox meyillidi. Oyunun ab-havasına uyğun hakimlik hiss olunmadı. Təəssüf ki, UEFA belə oyuna şotlandiyalı referini təyin etmişdi. Hakimin verdiyi qərarlar gərginlik yaradırdı ki, bu da kənardan hiss olunurdu. Hakim daha inamlı olmalıdı, amma bu oyunda baş hakimdə inam hiss etmədim. Gördüklərini verirdi, bu da o deməkdi ki, biliyi və savadı bura qədər imiş. "Qarabağ"ın oyunçuları da daha diqqətli olmalıdı. Xüsusilə də meydanın mərkəzində belə hərəkət etmək olmaz. Futbolçuların hərəkəti nəticəyə təsir edir. Qırmızı vərəqə olmasaydı, bəlkə də oyun tam başqa atmosferdə keçərdi”.
RÖYANƏ OĞUZ
Digər xəbərlər
