''Qalatasaray'' camiəsinin sevimlisi Mauro İkardi adını klub tarixinə yazdırmaqda davam edir.

Ötən həftəsonu ''Antalyaspor''la matçda dubl edən argentinalı forvard Avropa Liqasında ''Elfsborq''la oyunda da meydanı qolsuz tərk etmədi. Bununla da İkardi İstanbul nəhənginin heyətində 85-ci rəsmi oyunda vurduğu qolların sayını 61-ə yüksəldərək klub tarixinin ən məhsuldar əcnəbi oyunçuları siyahısında 2-ci pillədə olan Milan Baroşa çatdı! Amma çexiyalı forvard 61 qolu 116 oyunda vurmuşdu.

Həm də o, ''sarı-qırmızılar''da 4 mövsüm keçirmişdisə, İkardi hazırda 3-cü mövsümünü keçirir. İndi İkardinin önündə yalnız bir isim qaldı. Əfsanəvi George Haci ''Qalatasaray''ı 192 oyun, 72 qol, 63 məhsuldar ötürmə göstəriciləri ilə tərk etmişdi. İndi İkardiyə onu keçmək üçün 12 qol tələb olunur. Ümumilikdə isə İkardi klub tarixinin ən məhsuldar oyunçuları siyahısında Baroşla birlikdə 9-10-cu pillələri bölüşdürür. Onun 8-ci pillədəki Necati Atəşi (66) yaxalamasına 5 qol qalıb.

ƏLİ