“Qalatasaray” fanatı oğluna “Nuri İkardi” adını verdi - ərəblər yenə argentinalı forvardın arxasınca düşüb
“Qalatasaray” fanatlarının Mauro İkardiyə olan heyranlığı sərhəd tanımır.
Balıkəsirin Susurluq qəsəbəsində 8 ildi restoran işlədən Sərdar Aygörmüş çılğın “Qalatasaray” fanatı kimi tanınır. O, komandanın heç bir oyununu qaçırmır. Sərdar Aygörmüş ötən il suriyaəsilli Manel Aygörmüş ilə ailə həyatı qrmuşdu. “Qalatasaray”ın və xüsusilə də İkardinin fanatı olan Sərdarın 3 ay öncə oğlu dünyaya göz açıb. Hər yerdə “sarı-qırmızılar”a qəlbən bağlı olduğunu göstərməyə çalışan Aygörmüş yeni doğulan oğluna “Nuri İkardi” adını verib! Artıq oğlunun bütün sənədlərində məhz bu ad qeyd olunub. Ailəsi və yaxınları əvvəlcə buna qarşı çıxsalar da, sonradan bu ada öyrəşiblər. Türkiyə mətbuatına açıqlamalar verən Sərdar Aygörmüş bunları deyib:
“Uşaqlığımdan bəri fanatik “Qalatasaray”lıyam. Övladıma komanda ilə bağlı ad qoymaq həmişə mənim arzum idi. Ona görə də oğlum olandan sonra ona İkardinin adını vermək, komandaya olan bağlılığımı bu şəkildə göstərmək istədim. Nuri İkardi ilə birlikdə televizordan “Qalatasaray”ın oyunlarını izləyirik. Oğlum gələcəyin “Qalatasaray”lı ulduz futbolçusu olacaq. Gələcəkdə İkardinin yerinə məhz Nuri İkardi qolları vuracaq. Oğlumun 1 yaşı tamam olduqdan sonra onunla İstanbula gedib “Qalatasaray”ın oyunlarını birlikdə stadiondan izləyəcəyik. Oğlumun adını verdiyim İkardi kimi uğurlu olması üçün əlimdən gələni edəcəm”.
İkardinin özünə gəlincə, onunla bağlı növbəti dəfə diqqətçəkən bir transfer xəbəri yayılıb. İtaliya mətbuatının iddiasına görə “Əl-Kədisiyə” argentinalı forvarda görə ciddi büdcə ayırıb. Yeni mövsümdə Səudiyyə Ərəbistanının elitasında çıxış edəcək bu kollektiv təcrübəli hücumçuya 2 il üçün bonuslarla birlikdə 50 milyon avro (!) maaş təklif edib. Yaxşı maliyyə dəstəyi olan və bir ara baş məşqçi postuna Joze Mourinyonu gətirmək istəyən “Əl-Kədisiyə” bugünlərdə “Real”dan ayrılan Naço Fernandesi heyətinə qatıb. İkardiyə ötən yay da Səudiyyə Ərəbistanından başgicəlləndirici təkliflər gəlmiş, amma o, İstanbulda qalmağa üstünlük vermişdi.
Şayiələrə inansaq, İkardi bu çılğın təklifdən sonra düşünmək üçün vaxt istəyib. Başqan Dursun Özbək dünən “Ekol TV” kanalına açıqlamasında “İkardiyə görə bizə heç bir rəsmi təklif gəlməyib” açıqlamasını verib. 31 yaşlı hücumçu indiyə qədər “Cim-Bom”da 73 rəsmi oyunda 55 qol, 20 məhsuldar ötürməlik mükəmməl performans sərgiləyib. Hazırda o, klub tarixinin ən məhsuldar oyunçuları siyahısında yalnız Milan Baroşla (61) George Hacidən (72) geri qalır. Mauronun “sarı-qırmızılar”la 2026-ya qədər müqaviləsi var.
