Sinner ili birinci pillədə başa vuracaq
İtaliyalı tennisçi Yannik Sinner karyerasında ilk dəfə təqvim ilini dünya reytinqinin 1-ci pilləsində bitirəcək.
23 yaşlı idmançı liderliyi ən yaxın izləyicisi Karlos Alkaras Şanxayda keçirilən “Masters” seriyalı turnirin 1/4 finalında çexiyalı Tomaş Mahaça uduzandan sonra təmin edib. Hazırda Sinnerin hesabında 11920, Alkarasın hesabında isə 7120 xal var. Yeri gəlmişkən, Şanxay turniri bazar günü başa çatıb. Sinner finalda serb Novak Cokoviçə qalib gəlib - 7:6 (7:4), 6:3. Bu, 23 yaşlı Sinnerin karyerasındakı 17-ci tituldu. İtaliyalı ulduz 2024-cü ildə ikisi “Böyük dəbilqə” turniri olmaqla 7 titul qazanıb.
Bu arada Sinnerin sabiq fizioterapevti Cakomo Naldi dünyanın 1 nömrəli raketkasının dopinq işi ilə bağlı durumu şərh edib:
“İşlərim qaydasındadı. Bütün başqaları kimi, mən də başverənlərə görə təəssüflənirəm. Ümid edirəm ki, mənzərənin tam aydınlaşması üçün mən də gec-tez olanlar haqda danışa biləcəm. İctimaiyyətin bu məsələ ilə bağlı təfsirlərinə əsasən mühakimə yürütsək, yalnız mən günahkaram. Ancaq qərarı oxuyan hər kəsə bunun belə olmadığı bəllidi. Sadəcə, heç də hər kəs bu işin açılması üçün çalışmır”.
Xatırladaq ki, avqustda Sinnerin yazda verdiyi dopinq-testin nəticəsi kimi orqanizmində yasaq klestobol anabolik steroidi aşkarlanmışdı. 23 yaşlı idmançı antidopinq qaydalarının pozulması ittihamından yaxa qurtara bildi. O, yasaq maddənin orqanizminə fizioterapevtin ehtiyatsızlığı, yəni əlcəksiz masaj etməsi üzündən düşdüyünü sübut etdi. Sinner sonradan həm Naldi, həm də məşqçisi Umbero Ferrara ilə əməkdaşlığı dayandırdı.
Bununla belə, Ümumdünya Antidopinq Agentliyi (WADA) italiyalının 1-2 illiyə cəzalanmasına nail olmağa çalışır. Adı çəkilən qurum Sinnerin bəraət qazanması ilə bağlı qərardan İdman Arbitraj Məhkəməsinə (CAS) şikayət edib.
Digər xəbərlər
