Millimiz bu gün Millətlər Liqasının C liqasında növbəti oyununu keçirəcək.

Matç “CBC Sport”la canlı yayınlanacaq.

Millətlər Liqası
qrup mərhələsi, 3-cü tur
Estoniya – Azərbaycan 3:1
Yoan Yakovlev, 32. Vlasi Sinyavskiy, 45+2. Rokko Şeyn, 71. - Toral Bayramov, 45-p.
Tallin, “Lilleküla” stadionu. Saat 20.00.

1-ci turda evdə İsveçə (1:3), 2-ci turda səfərdə Slovakiyaya (0:2) uduzan yığmamız Estoniya millisinin qonağı olacaq. Etiraf edək ki, bu komanda qrupda arxayınlıqla məğlub edə biləcəyimizi düşündüyümüz yeganə rəqibdi. Yığmamızın bu oyunun favoriti olduğunu deyə bilərik. Əvvəlcədən qeyd edək ki, bu rəqiblə indiyə qədər bütün turnirlər çərçivəsində 10 dəfə qarşılaşıb. Bunların 3-də bizimkilər, 2-də estonlar qalib gəlib, 5-də isə “sülh” qeydə alınıb. Topların nisbətində rəqib öndədi - 9:8.

İş orasındadı ki, estonlarla ötən “futbol ili”ndə iki dəfə üzləşmişik. Komandalar AÇ-2024-ün seçmə mərhələsində qarşılaşıb ki, Bakıda heç-heçə (1:1), səfərdə millimizin qələbəsi qeydə alınıb – 2:0. Estoniyanın bu oyun üçün açıqlanan heyətindəki futbolçuların əksəriyyəti həmin matçlarda da iştirak ərizəsində yer alıb. Yəni onsuz da tanış olan rəqib, demək olar ki, eyni oyunçulardan qurulub. Bu məqam yığmamızın xeyrinə işləyə bilər. Əlbəttə, həmin ab-havanın millimizin heyətində də hökm sürdüyünü unutmamalıyıq. Əksinə, bu dəfə komandada ciddi itkilər var. Söhbət zədələndikləri üçün heyətdən çıxarılan Bəhlul Mustafazadədən və Vadim Abdullayevlə əvəzlənən Elvin Camalovdan gedir. Belədə müdafiə xəttində ciddi problemlərin yaranacağını düşünmək olar. Təbii ki, baş məşqçi Fernando Santuş həmin boşluqları düzgün seçimlərlə doldurmasa...

Başqa məsələ isə ümumi performansla bağlıdı. Yəqin ki, çoxu bu matçda kapitan sarğısının kimdə olacağını düşünür. Düzü, Santuşun heyəti açıqladığı mətbuat konfransında dedikləri ağla Emin Mahmudova ikinci şans verildiyini gətirir. Həqiqətən təcrübəli futbolçu potensialından yararlansa, liderlik keyfiyyətlərini ortaya qoysa, ilk qələbəni qazanmaq o qədər də çətin olmayacaq. Əlbəttə, buna Fernando Santuşun da ehtiyacı var. Ən azı ona görə ki, Estoniya millimizin “dişinə görədi”.

Bəs uduzsaq? Belədə turnir cədvəlinin 4-cü – sonuncu sırasında qərarlaşacağıq. İndi həmin pillədə estonlar var və çox güman, “zirzəmi”dən qurtulmaq üçün əllərindən gələni edəcəklər. Hər halda, yığmamız onlar üçün Slovakiya və İsveçlə müqayisədə daha asan rəqib kimi görünür.
Estoniya millisində də bəzi islahatların aparıldığını bildirək. Çünki sabiq baş məşqçi Tomas Heberlinin istefasından sonra yığma gənc mütəxəssis, estoniyalı Yurqen Henn və köməkçilərinə həvalə edilib. 37 yaşlı məşqçinin özünəməxsus hədəflərinin olduğunu və ambisiyalarının səviyyəsini nəzərə alsaq, millimizin işi asan olmayacaq. Çalışdırıcı bu il iyunun 5-də həmin vəzifəyə təyin edilib. “Flora”nın baş məşqçisi kimi işlədiyi 2018/19 mövsümündən başlayaraq premyer-liqada ardıcıl dörd dəfə çempion olub. 2019/20 “futbol ili”ndə ölkə kubokunu da qazanmaqla “qızıl dubl”a imza atıb. Görünür, meydanda FİFA reytinqində 113-cü (Azərbaycan) və 122-ci pillərində qərarlaşan yığmalarla yanaşı, yaşlı Santuşla gənc Hennin mübarizəsinə şahidlik edəcəyik.

Bu arada azarkeşlər millimizlə birlikdə səfərə yollanmayacaq. Yəqin ki, yığmamızı məhz Estoniyada yaşayan azərbaycanlılar dəstəkləyəcək.

Turun oktyabrın 11-də keçiriləcək digər oyununda İsveç Slovakiyanın qonağı olacaq. Millimiz slovakları 14-də, saat 20.00-da Tofiq Bəhramov adına Respublika stadionunda qəbul edəcək.

1. İsveç 2 2 0 0 6-1 6
2. Slovakiya 2 2 0 0 3-0 6
3. Azərbaycan 2 0 0 2 1-5 0
4. Estoniya 2 0 0 2 0-4 0

KƏNAN BAHADIR