Futbol üzrə əsas millimiz bu gün yoldaşlıq oyunu çərçivəsində Albaniya ilə qarşılaşıb.

"Football-plus.az" xəbər verir ki, Macarıstanda keçirilən qarşılaşma “CBC Sport” vasitəsilə canlı yayınlanıb.

7 iyun
Yoldaşlıq oyunu
Albaniya - Azərbaycan 3:1
Bayrami, 12, Manay, 81, Laçi, 87 - Musa Qurbanlı, 90
Hakimlər: MİHALİ KAPRALİ, İstvan Albert, Gerqo Vigh-Tarsonyi, İstvan Vad (hamısı Macarıstan).
Sombathey (Macarıstan). “Haladas SportKomplexum”. Saat 21.00.

Bilindiyi kimi, yığmamız matça Arif Əsədov və köməkçiləri İlham Yadullayev, Füzuli Məmmədov və Kamran Ağayevin rəhbərliyi altında çıxacaq. Komandamızın heyətiylə də tanışıq. Baş məşqçinin vəzifələrini yerinə yetirən mütəxəssis kollektivin rəngarəng olması üçün müəyyən dəyişikliklər edib. FİFA reytinqinə görə 66-cı pillədə qərarlaşan Albaniya yığması isə daha sabitdi. Maraqlıdı ki, Silvinyonun yığmanın şərəfini qorumaq məqsədilə dəvət etdiyi 27 futbolçunun hamısı legioner həyatı yaşayır. Yəni rəqib əsasən İngiltərə, İtaliya və Almaniya klublarında çıxış edən futbolçulardan qurulub. Əlbəttə, bu komandamızın çətin sınaq qarşısında olduğunun göstəricisidi. Belə düşünməyimizin səbəbi milliyə dəvət olunanların 2023/24 “futbol ili”ndə o qədər də ciddi uğurla yadda qalmamasıdı. Təəssüf ki, legionerlərimiz belə bu sıradadı. Təmsilçimizin xüsusilə hücum cəhdlərində tutarsız olacağını proqnozlaşdıra bilərik. Çünki indiki durumda Musa Qurbanlı, Mahir Emreli və Ramil Şeydayevin nə dərəcədə bacarıqlı olacağı sual altındadı. Belədə yarımmüdafiəçilərin performansı ön plana çıxmalıdı ki, çatışmazlıqlar kompensasiya edilsin.

Maraq üçün qeyd edək ki, yığmamız Albaniya ilə indiyə qədər 5 dəfə üz-üzə gəlib. Matçların hamısı yoldaşlıq oyunu çərçivəsində keçirilib ki, üçündə rəqib, birində bizimkilər qalib gəlib. Bir oyunda “sülh” qeydə alınıb. Topların nisbətində albanlar üstündü – 5:3. Tərəflər sonuncu dəfə 2011-ci ilin noyabrında qarşılaşıb (1:1). Daha bir önəmli məqam odu ki, Albaniya qarşıdakı Avropa çempionatının 24 iştirakçısından biridi.

KƏNAN BAHADIR