“Fasilə bizim xeyrimizə olacaq” – Azər Bağırov
“Kəpəz” Misli premyer-liqasının 9-cu turunda “Neftçi”ni 4:3 hesabıyla məğlub edib.
"Football-plus.az" xəbər verir ki, gəncəlilərin baş məşqçisi Azər Bağırov oyundan sonra keçirilən mətbuat konfransında bunları deyib:
“Bu gün Gəncəyə olan raket hücumunun ildönümüdü. Dünən uşaqlarla bunu qeyd etdik. Qələbəni bütün şəhidlərimizə və Gəncəyə həsr edirik. Birmənalı şəkildə sevincliyik. Çoxdan qələbəyə həsrət idik və bilirdik ki, doğru yoldayıq. Bu gün hər iki hissədə istədiklərimizi etdik. Sığortalı oynamağa çalışdıq və qol epizodlarımız oldu. Əlimizə düşən fürsətlərdən maksimum yararlandıq”.
- Hamı "Neftçi"nin qalib gələcəyini düşünürdü. Nəyi dəyişdiz ki, bu gün komandanız qələbə qazandı?
- Bura gələndən 3 oyunda 3 məğlubiyyət yaşamışdıq. Amma hər oyunda nələrisə daha yaxşı etməyə çalışırdıq. Bəzi şeyləri birdən-birə dəyişmək olmur, addım-addım etmək olur. İnanıram ki, bundan sonra daha yaxşı oyunlarımız olacaq. Hər şey inamdan asılıdı. Uşaqları inandıra bildik. Məncə, pis alınmadı.
- Qarşıda milli fasilə gəlir, daha sonra isə "Qarabağ"la oyun. Özünüzü necə hiss edirsiz?
- Çox gözəl. Fasilə bizim xeyrimizə olacaq. İstədiyimiz bəzi məqamları yaxşılaşdırmağa çalışacağıq. Sevincliyik ki, "Qarabağ"a qarşı oynayacağıq. Uşaqları həmin matça daha yaxşı kökləmək lazımdı.
- Oyun planınız nə idi? "Neftçi"nin hansı üstün cəhətlərini təhlil etmişdiz?
- "Neftçi"nin ən üstün cəhətləri cinahları və mərkəzi idi. Hamı istəyər ki, heyətində Ozobiç kimi "10 nömrə" olsun. İlk tapşırığımız bu oldu ki, bizim vingerlər cinahdan çox çıxmasın və rəqbin vingerlərini zərərsizləşdirsinlər. Braqanın bir az problemi var, ingiliscə yaxşı bilmir. Amma oyundan-oyuna yaxşı olacaq.
- Yeni transferiniz Mahamadu Banın start heyətdə meydana buraxdız. Futbolçu hazır idi?
- Mənim üçün futbolçunun yeni qoşulması önəmli deyil. Əsas onun beynində hazır olmasıdı. Futbolçu özü bildirdi ki, 70-80 faiz hazıram. Bu, mənə bəs elədi. Məncə, pis təsir bağışlamadı.
ƏSƏD SEYİDOV
Digər xəbərlər
