Sabah futbol üzrə ölkə çempionatının 1-ci liqasında 11-ci tur start götürəcək. Ötən həftə bəzi komandaların planı baş tutmadığından bu matçlarda itkiləri konpensasiya edəcəklər. Bu sırada MOİK də var. Yeni tur məhz ordu klubunun matçıyla başlayacaq. Qəzənfər Abbasovun komandası “doğma divarlar” arasında “Zaqatala” ilə qarşılaşacaq. Ötən tur liderliyi əldən verən “hərbçilər” qələbəyə köklənib. Yoxsa elita hədəfindən uzaqlaşa bilərlər. Rəqibin turnirin zəif bəndlərindən biri olması və ev oyunu amili komanda üçün yaxşı fürsətdi. Lakin Rüstəm Məmmədovun yetirmələrinə qarşı arxayın oynamaq riskli ola bilər. Çünki “Zaqatala” 10-cu turda “Difai Ağsu”nu 4:2 hesabıyla məğlub edərək özünəinamı qaytarmaq yolunda iddialı addım atıb. Günün ikinci oyununda “Difai Ağsu” “Karvan”ı qəbul edəcək. Vurğulamaqdan yorulsaq da, qeyd edək ki, ev sahibləri mövsüm ərzində qələbə qazanmayıb. Elgiz Kərəmlinin komandası üçün yevlaxlılarla görüş çətin keçəcək. Sensasiya ehtimalını istisna etməsək də, favorit “Karvan”dı. Çünki Kənan Kərimovun komandası son 4 matçda məğlub olmayıb. Üstəlik “Difai Ağsu” şəhər stadionunda görülən təmir-bərpa işləriylə bağlı Şamaxıda məskunlaşıb. Bu amilin də oyunun axarına müəyyən təsiri ola bilər.
Turun qalan oyunları dekabrın 14-də keçiriləcək.
13 dekabr
MOİK – Zaqatala
Binə, qəsəbə stadionu. Saat 14.00.
Difai Ağsu – Karvan
Şamaxı, şəhər stadionu. Saat 14.00.
Xal durumu: Qaradağ Lökbatan – 21, MOİK – 19, Şamaxı, İmişli, Karvan – 18, İrəvan – 17, Zaqatala – 13, Mingəçevir – 10, Araz Saatlı – 3, Difai Ağsu – 1.
Bombardirlər: Elşad Tağıyev (Şamaxı) – 10, Emin Zamanov (Şamaxı) – 6, Peter Kinqs (Karvan) – 6.

KƏNAN BAHADIR