“Qarabağ” “Tottenhem”lə səfər oyunundan xalsız döndü.

Nəzərə alsaq ki, yeni formatda qapıya vurulan hər top sonda komandanın turnir mövqeyinə təsir edəcək, onda itirilən 3 xal qədər 3 top da bizim əleyhimizədi.

Matçdan sonra sosial şəbəkələrdə oyunçuların səhvləri müzakirə olunarkən çoxları qapıçının üzərində dayandı. Qapımıza vurulan 2-ci və 3-cü qollarda Mateuş Koxalskinin kobud səhvi var idi. Halbuki polşalı qapıçıya böyük ümidlər bəsləyirdik. Açığı, onun Andrey Lunyovu unutdurduğunu da demək olmaz. Dünən hazırda Rusiya klublarından “Dinamo”nun şərəfini qoruyan qapıçı ilə söhbətləşdik, müəyyən suallara cavab tapmağa çalışdıq.

- “Qarabağ”ın “Tottenhem”lə oyununu izlədinmi? Səncə, “Qarabağ” dünən azlıqda olan komandaya qarşı yaxşı mübarizə apara bilmədi, yoxsa bəxti gətirmədi?
- Oyuna baxdım. Nəticə çox üzücüdü. Nəzərə alsaq ki, rəqib çox erkən azlıqda qaldı, oyunun böyük hissəsini 10 nəfərlə keçirdi. Düşünmürəm ki, “Qarabağ” zəif oynadı. Bunu yalnız nəticəyə görə söyləmək olar. Amma oyuna baxsaq, komanda kifayət qədər qol fürsəti yaxaladı. Üstəlik şanssız qollar buraxdı. “Qarabağ” əlinə düşən fürsətləri dəyərləndirsəydi, bəlkə də nəticə başqa cür olardı. Qalib gəlmək də mümkün olardı. Amma bu futboldu, təəssüf ki, belə şeylər olur. Əminəm ki, komanda oyunu təhlil edərək səhvlərindən nəticə çıxaracaq və gələcəkdə bu təcrübədən faydalanacaq.

- “Qarabağ” son üç avrokubok oyununda qol vura bilməyib. Bunu nə ilə bağlayardın? Səncə, rəqiblər daha güclüdü, yoxsa bizimkilərdə ustalıq çatmır?
- Qol vurmamaqla bağlı dəqiq söz deyə bilmərəm. Çünki bütün oyunlara baxmamışam. Ancaq “Qarabağ”ın yüzfaizlik qol imkanları olub. Sadəcə, komanda onları dəyərləndirə bilmir. Bunun nə ilə bağlı olduğunu demək çətindi. Ola bilər ki, ya ümumi təzyiqdən, ya da futbolçuların özündən qaynaqlanır. “Qarabağ” yaxşı və özünəməxsus tərzdə oynayır - cəld ötürmələr və müdafiədən hücuma sürətli çıxış. Sadəcə, son nöqtəni qoymaqla bağlı problem var. Fikrimcə, sadəcə səbirli olmaq lazımdı. Məşqlərdə futbolçular yaxşı çalışır. Gec-tez bunun bəhrəsini görəcəklər.

- “Tottenhem”in vurduğu 2-3-cü qollara görə Koxalskini günahlandıranlar çox oldu. Hətta deyildi ki, bəlkə də Lunyov o topları çıxara bilərdi. Sən olsaydın, üç topdan hansını çıxara bilməzdin?
- Bu haqda danışmaq mənasızdı və mənim tərəfimdən düzgün olmaz. Komandada qapıçılar üzrə məşqçi var, onlar öz aralarında səhvləri təhlil edəcəklər. Yalnız heç nə etməyənlər səhv eləmir, yəni oynayırsansa, səhvlər olmalıdı.  

- Belə fikir də var ki, “Qarabağ” bu il sanki zəifləyib. Bunun səbəbi nə ola bilər? “Qarabağ”da oynamış biri kimi problemi nədə görürsən?
- Bu fikirlə razı deyiləm. Çünki komanda bütün əsas oyunçularını heyətdə saxlayıb, üstəlik ötən mövsümlə müqayisədə daha təcrübəli olub. Ona görə də yalnız “Dinamo” və “Tottenhem” ilə oyunlara görə mülahizə yürütmək düzgün deyil. Avrokubok mövsümünün bitməsini gözləmək lazımdı. Yalnız bundan sonra konkret fikir bildirmək mümkün olacaq. Hələlik isə əksinə, “Qarabağ”ı dəstəkləmək və oyunçulara müsbət enerji ötürmək lazımdı ki, qalan 7 oyunda “Qarabağ” yaxşı futbol sərgiləsin, uğurlu nəticələr qazanaraq hamını sevindirsin.

- Növbəti qarşılaşma “Malmö” ilə olacaq. Bu oyunda “Qarabağ” xal ala bilərmi?
- Əvvəlki oyunlarda olduğu kimi, yenə komandadan parlaq oyun və qələbə gözləyəcəm. Çünki “Qarabağ” təcrübəli və baxımlı futbol oynayan komandadı. Əminəm ki, hər şey yaxşı olacaq.

RÖYANƏ OĞUZ