Mövsümün ilk “Qarabağ” – “Neftçi” dueli “köhlən atlar”ın 4:0 hesablı qələbəsi ilə başa çatdı.

Oyundan sonra ağdamlıların müdafiəçisi Elvin Cəfərquliyev “Football-plus.az”ın suallarını cavablayıb.

- Bu 4:0-lıq qələbəni nəyə bağlayardın?
- Fikrimcə, maraqlı oyun keçdi. Xüsusən də bu oyunu maraqlı edən azarkeşlər idi. Bizə dəstək olduqları üçün onlara təşəkkürümü bildirirəm. Qələbəyə layiq idik və sevinirəm ki, qələbə qazandıq.

- Budəfəki derbi sanki azarkeşlərin gözündə əvvəllkilərdən daha zəif təsir bağışlayırdı. Səmimi danışsaq, oyuna hazırlaşanda komandanız necə düşünürdü?
- “Neftçi”nin adı varsa, biz oyuna daha motivasiyalı başlayırıq. Bilirik ki, bu derbi daha çox maraqlı olur. Ola bilər maraq baxımından hardasa fərq olsun, lakin biz hər dəfə əlimizdən gələni edirik ki, eyni vəziyyətdə çıxaq.

- Zaqreb “Dinamo”sunun “Bavariya”ya 2:9 məğlub olduğu matçı izlədinmi?
- Canlı izləməmişdim. Lakin daha sonra baxdım.

- Belə bir şərhlər də gəldi ki, “Bavariya” sanki “Qarabağ”ın qisasını aldı. Səncə, siz olsaydız, fərq belə böyük ola bilərdi?
- Qismət beləymiş (gülür). Əlbəttə, bizim üçün də asan olmayacaqdı. “Bavariya”ya qarşı oynamaq heç kimə asan olmaz.

- Növbəti oyun “Tottenhem”lə olacaq. Komanda haqda məlumatın varmı?
- Komanda olaraq təhlil etməmişik. Təbii ki, məşhur klub olduğunu bilirik. Bundan sonra bu oyuna köklənəcəyik.

- Qara Qarayevin “Neftçi”dən ayrılmasına necə münasibət bildirərdin?
- Qara dostumdu, çox yaxşı münasibətimiz var. Amma bu haqda fikir bildirmək istəmirəm.

ROYANƏ OĞUZ