“Öncə onu deyim ki, "Tottenhem"in azlıqda qalması bizə xoş təsir etdi, heç də dezavantaja çevrilmədi. Oyunçularımız heç də arxayınlaşmadılar. Arxayınlaşsaydılar, bu qədər geri oturmazdılar. Yəni topa nəzarətə baxsaq, "Tottenhem"də 53, “Qarabağ”da 47 faizdi. Sadəcə, rəqib azlıqda qaldığı halda belə, bizə qalib gələ bildi. "Qırmızı" olmasaydı, bizi daha pis vəziyyətə sala, daha çox qol vura bilərdilər. Düşünmürəm ki, oyunçularımız azlıqda qalandan sonra arxayınlasıb məğlub oldular. Bəli, “Qarabağ”ın son 3 oyunda qol vura bilməməsi böyük problemdi. Bu oyunda üç epizod oldu ki, qola çevirə bilmədik. Əvvəlki matçlarda da çoxlu qol imkanı boşa verilib. Oyundan öncə də "Tottenhem"in nə qədər öndə oynayacağını demişdim. Yəni rəqibin müdafiə xətti ağlasığmaz dərəcədə öndə oynayırdı. Bu da riskli idi, "Qarabağ"ın oyunçuları sürətli qaça bilərdi. Bunu bilirdik, belə də oldu. Əslində daha çox qol vəziyyəti yaratmaq olardı, amma az yaratdılar, onları da qola çevirə bilmədilər. Düzü, zaman-zaman fikirləşirdim ki, “Qarabağ”ın Juninyo, Leondro Andrade, Zubir kimi hücum oyunçuları var. Bunlar bəzən elə oyun nümayiş etdirir ki, fikirləşirsən Juninyonu "Benfika" və ya "Portu" nə əcəb götürməyib. Yəqin məhz elə qeyri-sabitliyə görə böyük klubların diqqətini çəkmirlər. Ümid edək ki, növbəti matçlarda imkanları qola çevirə biləcəklər. Fikrimcə, bu qeyri-sabitlik oyunçunun keyfiyyəti ilə bağlı olan şeydi. Komandaya mərkəz hücumçusunun lazım olduğunu düşünmürəm. Juninyodan daha yaxşı oyunçu varsa, təbii ki, "Qarabağ"a lazımdı. Beləsi hansı məbləğ qarşılığında gələcək – düşünməliyik. Hazırda Juninyo "Qarabağ" adına yaxşı bir hücumçudu. Zatən Juninyo bütün imkanları qola çevirsəydi, burda yox, başqa klubda oynayardı. Amma məhz "Qarabağ" üçün əla hücumçudu. Zaman-zaman qol vura, qol vurmayanda da müdafiə xəttini  təzyiq altında saxlaya bilir. Ona görə ehtiyat hücumçuya ehtiyac var. Amma Juninyonu əvəzləyəcək daha yaxşı mərkəz hücumçunun gələcəyini düşünmürəm”.