La Liqanın 7-ci turunda ''Real'' fanatları önündə ''Alaves''i qəbul etdi.

Bu mövsüm ilk yarılarda qol vura bilməyən Madrid nəhəngi nəhayət, şeytanın qıçını qırdı. Vaskes və Mbappenin qolları ilə fasiləyə iki topluq üstünlüklə yollanan ''Real'' ikinci hissənin əvvəllərində Rodriqo ilə fərqi daha da artırdı. Maraqlıdı ki, ilk yarı bitdikdən sonra Mbappedən formasını istəyən ''Alaves''li Abdal Abkar fasilədə əvəzləndi. İddialara görə baş məşqçi onu məhz bu hərəkətinə görə əvəzlədi. Hər şey ''Real''ın asan qələbəsinə doğru gedərkən son anlarda qonaqlar fəallaşdılar. ''Alaves'' 85 və 86-cı dəqiqələrdə vurduğu qollarla fərqi minimuma endirsə də, komandanın bundan artığına gücü çatmadı. Ardıcıl 5-ci rəsmi oyunda qol vuran Mbappe ''Kral klubu''nun heyətində 9 rəsmi oyunda artıq 7 qol, 1 məhsuldar ötürməlik göstəricilərə nail olub. Yeri gəlmişkən, fransalı superulduz klub karyerasında qol və ötürmə baxımından 400 xallıq göstəriciyə çatdı. Belə ki, o, 377 oyunda 290 qol, 110 məhsuldar ötürmə ilə yadda qalıb. Bundan başqa ''Real'' Karlo Ançelottinin başçılığı altında yubiley - 300-cü rəsmi oyununu keçirdi. Komanda bu oyunlardan 218 qələbə, 43 heç-heçə, 39 məğlubiyyətlə ayrılıb. Baş məşqçi kimi oyun sayı baxımından o yalnız Migel Munyosdan (605) geri qalır.

Maraqlıdı ki, oyun sayı baxımından böyük fərqə baxmayaraq bu məşqçilərin qazandıqları titul sayı (14) eynidi.

ƏLİ