Braziliya çempionatında keçirilən 26-cı turun oyunlarından sonra liderər qrupunda vəziyyət bir qədər dəyişdi. A seriyasında əvvəlki turda zirvəni yenidən ələ keçirən “Botafoqo” liderliyini davam etdirdi, amma rio de janeyroluların əsas izləyicisi artıq “Fortaleza” deyil.

Lider Rio de Janeyroda keçirilən “Korintians” ilə oyunda gözlənilən qələbəni qazandı. Lakin bu mövsüm zəif çıxış edən san paululularla matç heç də asan keçmədi. “Botafoqo” 39-cu dəqiqədə Luis Enrike ilə hesabı açdı. Cavab qolu tezliklə reallaşa bilərdi. Lakin qonaqların paraqvaylı hücumçusu Anxel Romero fasiləyə bir neçə saniyə qalmış penaltini qola çevirə bilmədi. Buna baxmayaraq, “Korintians” 63-cü dəqiqədə hesabı bərabərləşdirdi. Bundan sonra böyük qüvvə ilə irəli atılan ev sahibləri Almadanın zərbəsi ilə yenidən önə keçdilər. Matç 2:1 hesabı ilə nəticələndi və Artur Jorjenin çalışdırdığı “Botafoqo” liderliyini davam etdirdi.

24-cü turda bu mövsüm ilk dəfə liderliyə yüksələn fortalezalılar zirvədəki yerini qoruya bilməmiş və “Botafoqo”ya 0:2 hesablı məğlubiyyətlə 2-ci yerə düşmüşdü. Xuan Voyvodanın komandası üçün növbəti iki oyun da uğursuz alındı. “Göy-qırmızılar” əvvəlcə 19-cu turdan təxirə salınan oyunda “İnternasyonal”a 1:2 hesabıyla uduzdular. 26-cı turun “Atletiko Paranaense” ilə matç isə heç-heçə nəticələndi – 1:1. Başqa sözlə, “Fortaleza” çempionatın potensial lideri sayılsa da, bu imkanı reallaşdıra bilmədi və 3-cü yerə düşdü.

Fortalezalıların iki oyunda hesabına yalnız 1 xal yaza bilməsi “Palmeyras”ın işinə yaradı. Ölkə nəhəngi turu qalib başa vurdu. Özü də evdə “Krisiuma”nın qapısından 5 cavabsız top keçirməklə 3-cü yerdən 2-yə yüksəldi. Qələbə seriyasını 4-ə çatdıran Abel Ferreyranın komandası liderdən yenə 3 xal geri qalır.

“Flamenqo” isə ardıcıl ikinci matçda qaləbə qazana bilmədi. Titenin komandası öz meydanında “Vasku da Qama” ilə 1:1 hesabına razılaşdı. Qonaqları məğlubiyyətdən uzun müddət Avropada oynamış Koutinyo xilas etdi. 32 yaşlı yarımmüdafiəçinin cavab qolu “qırmızı-qaralar”ın 4-cü pillədəki mövqeyinə təsir etmədi. Ehtiyatda bir təxirə salınan oyunu olan “Flamenqo” liderdən indi 8 xal geri qalır.

Turun “Kruzeyro” – “San Paulu” matçının nəticəsi maraqla gözlənilirdi. Cədvəldə qonşu olan komandaların duelindən minimal hesabla “San Paulu” qalib çıxdı. Argentinalı Luis Subeldianın komandası belu orizonteliləri qabaqlayaraq 5-ci yerə yüksəldi, “Kruzeyro” isə bu pillədən 7-ci yerə düşdü.

26-cı tur
Botafoqo RJ - Korintians 2:1
Luis Enrike, 39. Almada, 67 – Qarro, 63.
Atletiko Paranaense – Fortaleza 1:1
Kanobbio, 28 – Moyses, 14.
Palmeyras - Krisiuma 5:0
Lopes, 1. Felipe Anderson, 15. Tobias Fiqeyredo, 18-öz qapısına. Estevao, 52. Rafael Veyqa, 77.
Flamenqo - Vasku da Qama 1:1
Jerson, 72 – Koutinyo, 87.
Kruzeyro - San Paulu 0:1
Villiam, 59.
Atletiko Qoyaniense - Vitoriya 0:2
Alerrandro, 13. Mateuzinyo, 78.
Braqantino – Qremio 2:2
Eduardo Saşa, 44-p. Vinisius, 63 – Monsalve, 28. Jemerson, 53.
Bayya - Atletiko Mineyro 3:0
Everaldo, 51. Everton Ribeyro, 58. L.Rodriges, 90+2.
İnternasyonal - Kuyaba 3:0
Alan Patrik, 11-p. Merkado, 41. Borre, 73.
Juventude - Fluminense 2:1
Ronaldo, 81. Marselinyo, 83 - Aryas, 27.

19-cu turdan təxirə salınan oyun
İnternasyonal - Fortaleza 2:1
Alan Patrik, 21. Qustavo Prado, 83 – Titi, 45+2.

16-cı turdan təxirə salınan oyun
Kuyaba - Juventude 0:0

1. Botafoqo RJ 26 16 5 5 45-25 53
2. Palmeyras 26 15 5 6 43-19 50
3. Fortaleza 26 14 7 5 32-25 49
4. Flamenqo 25 13 6 6 40-29 45
5. San Paulu 26 13 5 8 34-26 44
6. Bayya 26 12 6 8 37-27 42
7. Kruzeyro 26 12 5 9 34-27 41
8. İnternasyonal 24 10 8 6 27-20 38
9. Vasku da Qama 25 10 5 10 29-34 34
10. Atletiko Mineyro 24 8 9 7 32-36 33
11. Juventude 26 8 8 10 31-36 32
12. Braqantino 25 8 7 10 31-32 31
13. Atletiko Paranaense 24 8 6 10 27-29 30
14. Qremio 24 8 4 12 25-30 28
15. Krisiuma 25 7 7 11 32-40 28
16. Fluminense 25 7 6 12 21-28 27
17. Vitoriya 26 7 4 15 28-39 25
18. Korintians 26 5 10 11 23-33 25
19. Kuyaba 25 5 7 13 23-38 22
20. Atletiko Qoyaniense 26 4 6 16 21-42 18

Bombardirlər: Pedro (Flamenqo) – 11, Estevao (Palmeyras) - 9, Lopes (Palmeyras), Lusero (Fortaleza), Veqetti (Vasku da Qama) - 8.