Avrokuboklara vəsiqə qazanmaq uğrunda gərgin mübarizəyə şahidlik edirik.

“Neftçi”, “Sabah” və “Sumqayıt” ilə yanaşı, “Zirə” də əsas iddialılardandı. Qazanılan hər xal, hər qələbə komandanı Avropaya bir addım da yaxınlaşdırır. “Kəpəz”ə gəlincə, komanda elitada qalmağı rəsmiləşdirəndən sonra bəzi itkilərlə üzləşdi. Belə ki, ən önəmli oyunçulardan Papunaşvili zədəlidi. Onanuqa, Martins və Seyidov isə cəazlı olduğundan bu görüşdə komandaya kömək edə bilməyəcəkdi. Ümumilikdə “sarı-göylər”in sonluq üçün əsas hədəfi mövsümü “Araz-Naxçıvan”dan öndə bitirməkdi.

Bərabaşdan deyək ki, oyun gözlənilən qədər maraqlı keçmədi. “Çərçivə”yə ilk zərbə qonaqlardan gəldi. 4-cü dəqiqədə Nuriyevin sol ayaqla zərbəsi qapıçı üçün heç bir çətinlik yaratmadı. Rəşad Sadıqovun yetirmələri 17-ci dəqiqədə qapıya növbəti dəfə zərbə ilə yadda qaldı. Məqsədin sol cinahla irəliləyib, cərimə meydançası daxilindən yaxın “altılığ”a göndərdiyi topu qolkiper dəf etdi. İki dəqiqə sonra Sumanın incə ara ötürməsinin Utziqə çatmasına Ehtiram mane oldu. Gəncəlilər müdafiədə sıx oynadığından, inamlı təsir bağışladığından qonaqlar əsasən uzaq məsafədən qapıya yol tapmağa çalışırdı. Belə bərbələrdən biri 23-cü dəqiqəyə təsadüd etdi. Rəhimlə “divar paslaşması”nın ardından Salifunun işlək olan sol ayaqla vurduğu qüvvətli zərbə qapıdan azca aralı keçdi. “Sarı-göylər”in qapıya ilk zərbəsini 32-ci dəqiqədə izlədik. Kvirkviyanın zərbəsi olduqca qeyri-dəqiq oldu. Bir qədər sonra “Kəpəz”in futbolçuları avtoqola imza atmağa yaxın idi. Rəhimin qapı önünə ötürməsini uzaqlaşdırmaq istəyən Əlicanov tərs toxunuşla az qala topu tora qovuşduracaqdı. İlk yarıya artırılan sonuncu dəqiqədə qonaqlar yenə hesabı açmağa yaxın olud. Qismətin künc zərbəsindən cərimə meydançasına ünvanladığı ötürməni Renato hava mübarizəsindən qalib ayrılıb, başla “çərçivə”yə göndərsə də, top tirin üzərindən keçdi.

2-ci hissə yenicə başlamışdı ki, qonaqlar hesabı açdı. Rəhimin ötürməsindən sonra Suma sürəti hesabına Məsimovu geridə qoyub, topu Rodrisezin baş üzərindən aşıraraq qapıya saldı – 0:1. Meydan sahibləri hücumun başlanğıcında topun Rəhimin əlinə dəydiyini bildirib etiraz etdi. Lakin bir dəqiqə sonra VAR-dan gələn qərarla Həmzəzadə qolu qeydə aldı. 72-ci dəqiqədə Salifu hesab arasındakı fərqi artırmağa yaxın oldu. Amma portuqaliyalı qolkiper qanalı futbolçunun dubl etməsinə icazə vermədi. Gəncəlilər 76-cı dəqiqədə hesabı bərabərləşdirmək üçün ən ideal fürsəti boşa verdi. Belə ki, Fuad başla geriyə ötürmə zamanı səhvə yol verdi, Yunanov da bundan yararlanaraq topu komanda yoldaşı Nianeyə ötürdü. 30 yaşlı malili oyunçu qapıçını keçsə də, Renatoyla mübarizədə yerdə qaldı. 87-ci dəqiqədə oyuna sonradan qoşulan Meza Kolli uzaq məsafədən “çərçivə”ni nişan aldı. Lakin bu zərbə dəqiq olmadı. Beləliklə, yeganə və müəmmalı qolla qalib gələn qəsəbə təmsilçisi səfərdən 3 xalla dönməyi bacardı. “Kəpəz” üçün isə bu mövsümün artıq başa çatdığını demək olar.

Gözdən qaçmadı
* “Xəmsə” fanklubu hakimin ünvanına təhqiramiz şüarlar səsləndirdi.
* Matçdan sonra Adil Şükürov rəqib komandanın üzvləri ilə aqressiv şəkildə görüşdü.

KAMAL SƏFƏR