2-ci yerə iddiasını gizlətməyən “Sabah”a qələbə lazım idisə, bu oyun həm də avrokuboklar uğrunda mübarizədən çəkilməyən “Turan Tovuz” üçün bəlkə də son şans idi.

İlk təhlükəli vəziyyəti meydan sahibləri yaratdı. Marandiçinin cərimə meydançasına ötürməsini qolkiper uzaqlaşdırdı, Fərid Nəbiyevin zərbəsi isə qeyri-dəqiq oldu. Topa nəzarəti ələ keçirən tovuzluların yaratdığı növbəti təhlükəli vəziyyət zamanı Xəyal Nəcəfovun uzun ötürməsini Pusi qəbul etdi. Cərimə meydançasına daxil olan albaniyalı hücumçunun baxımlı zərbəsini Mehbalıyev küncə çıxardı. İlk 20 dəqiqədə qonaqlar heç nə ilə yadda qalmadı. Nəhayət, onların ifasında ilk təhlükəli vəziyyətin şahidi olduq. Marqarita cərimə meydançasına doğru ötürmə versə də, Aydın yerində idi. Epizodun davamında əks-hücuma çıxan Abbasovun yetirmələri hesabı açmağa yaxın oldu. Nəbiyevin qapıdan yan keçən zərbəsi azarkeşləri həyəcanlandırdı. “Turan Tovuz”un təzyiqi, nəhayət, 26-cı dəqiqədə bəhrə verdi. Aleks Souzanın qapıya zərbəsi qolla nəticələndi - 1:0. İlk hissənin sonlarına yaxın qonaqlar cərimə zərbəsi qazandı. Sekidika birbaşa qapıya zərbə vursa da, Aydın topu dəf etməyi bacardı. İkinci hissə qonaqların kəskin təzyiqiylə başladı və ilk yarı ilə müqayisədə daha canlı keçdi. 51-ci dəqiqədə Ayaz Quliyev uzaqdan baxımlı zərbə endirsə də, Aydın topun tora qovuşmasına mane oldu. 82-ci dəqiqədə Cona qarşı qayda pozuldu və tovuzlular cərimə zərbəsi qazandı. Serranonun qapı qarşısına ötürməsini “bayquşlar” uzaqlaşdıra bilmədi. Bunu fürsət bilən migeriyalı hücumçu topu tora qovuşdurmağı bacardı. Yan xətt hakimi ofsayd bayrağını qaldırsa da, Əliyar Ağayev VAR-dan gələn qərardan sonra qolu qeydə aldı - 2:0. Beləliklə, “Turan Tovuz” qələbə sayəsində turnir cədvəlində 6-cı pilləyə yüksəldi, “Sabah” isə Renduliçlə ardıcıl ikinci dəfə uduzdu.

Gözdən qaçmadı
* “Soldati di Sabah” azarkeş qrupu fərqli tribunada yer almışdı.
* 4-cü hakim dəfələrlə Ayxan Abbasovdan oyun üçün ayrılan yeri tərk etməməyi tələb etdi.

ƏSƏD SEYİDOV