Bir illik Avstraliya macərasının ardından Yaponiyaya yollanan Tolqay Arslan yeni ölkədə də adından söz etdirməkdə davam edir.

“Melburn Siti”də ötən mövsümün ən yaxşı oyunçusu seçilən və bu yay “Sanfreççe Hirosima”ya yollanan təcrübəli futbolçu çox məhsuldar oyun sərgiləyir. Komandasının avqustun 31-də Yaponiya çempionatının 29-cu turunda “Tokio”nu evdə 3:2 hesabı ilə yendiyi qarşılaşmada het-trik edən 34 yaşlı futbolçu sentyabrın 4-də isə liqa kuboku çərçivəsində səfərdə “Naqoya Qrampus”la görüşdə yeganə qolun müəllifi olaraq komandasına qələbə qazandırıb.

O daha bir qolu isə ölkə kubokunda vurub. Tolqay indiyə qədər “Sanfreççe Hirosima”da meydana çıxdığı 7 rəsmi oyunda 7 qol, 1 məhsuldar ötürməlik əla performans sərgiləyib. Ümumiyyətlə bu futbolçunun karyerasının sonuna yaxın məhsuldarlığının artması diqqət çəkir.

Bilindiyi kimi Almaniyada doğulan və “Hamburq”un yetirməsi olan Tolqay daha öncə Türkiyədə “Beşiktaş” və “Fənərbaxça”nın şərəfini qorumuşdu. Təsəvvür edin ki, o, 2014-20-ci illər ərzində İstanbul nəhənglərinin heyətində Türkiyə çempionatında meydana çıxdığı 113 matçın heç birində qol vura bilməmişdi! Daha sonra üçillik “Udineze” macərası zamanı da 100-dən çox oyun keçirməsinə baxmayaraq cəmi 5 dəfə qol sevinci yaşamışdı. Tolqayın qol duyumu Avstraliyaya yollandıqdan sonra artmağa başladı. Ötən mövsüm o, “Melburn Siti”də 34 rəsmi oyunda 19 qol, 7 məhsuldar ötürməlik əla performans sərgilədi.