Bu yay ''Udineze''dən ayrılaraq azad agent statusunda Avstraliyaya yollanan və ''Melburn Siti'' ilə müqavilə imzalayan türkiyəli yarımmüdafiəçi Tolqay Arslan məhsuldarlığı ilə diqqət çəkir.

Hətta təcrübəli futbolçu indidən şəxsi rekordunu böyük fərqlə yeniləyib. Tolqay indiyə qədər ''Melburn Siti''nin heyətində 9-u çempionatda, 4-ü kubokda, 6-sı Asiya Çempionlar Liqasında olmaq 19 rəsmi oyunda 10 qol, 4 məhsuldar ötürməlik performans sərgiləyib. Bu, onun üçün inanılmaz göstəricilərdi. Çünki Tolqay heç vaxt məhsuldar oyunçulardan olmayıb.

Buna qədər 32 yaşlı futbolçu peşəkar karyerasında bir mövsümə 3-dən artıq qol vurmamışdı. Arslan daha öncə Türkiyədə ''Beşiktaş'' və ''Fənərbaxça''da da top qovub.

Maraqlıdı ki, bu klubların heyətində o, Türkiyə çempionatında keçirdiyi ümumilikdə 113 oyunun heç birində qol vurmamışdı! Tolqayla yanaşı ''Melburn Siti''də daha öncə superliqada oynamış daha bir futbolçu - Əziz Behiç də top qovur. Melburn təmsilçisi daxili çempionatda 10 tura topladığı 15 xalla 4-cü pillədə qərarlaşıb.

ƏLİ