Karyerasını Avstraliya təmsilçisi “Melburn Siti”də davam etdirən Tolqay Arslan üçün mövsüm çox uğurlu və yaddalan alındı.

“Football-plus.az” xəbər verir ki, daha öncə Türkiyədə ”Fənərbaxça” və “Beşiktaş”ın formasını geymiş Arslan “Melburn Siti”də mövsümün ən yaxşı futbolçusu seçilib. Çərşənbə günü “Melburn Siti” üçün mövsümün yekunlarına dair bir tədbir keçirildi. Orda bir çox nominasiyada komandanın ən yaxşıları seçildi. 33 yaşlı türkiyəli yarımmüdafiəçi birdən-birə iki nominasiyada qalib gəldi. O, komanda yoldaşları arasında aparılan sorğuda qalib gəlməklə bu klubun əfsanəsi Skott Ceymisonun adını daşıyan mükafatı qazandı. Bundan başqa, Tolqay həm də “Qızıl buts” qazanaraq komandasının ən məhsuldar futbolçusu oldu. O, 2023/24-də 34 rəsmi oyunda iştirak edərək 19 qol, 7 məhsuldar ötürməlik diqqətçəkən performans sərgilədi. Halbuki Tolqay karyerası boyunca heç vaxt məhsuldar futbolçu sayılmayıb. Təkcə bir faktı vurğulayaq ki, o, 2014-20-ci illərdə “Fənərbaxça” və “Beşiktaş”ın heyətində Türkiyədə çempionatında keçirdiyi ümumilikdə 113 matçın heç birində (!) qol vurmamışdı. Türkiyədən ayrılandan sonra Arslan “Udineze”yə yollandı və 3 mövsüm burda top qovdu. Yalnız İtaliyada onun yavaş-yavaş “ayağı açılmağa” başladı - A seriyasında 96 oyuna 5 qol vurdu. Avstraliyada isə Tolqay göründüyü kimi, özünü yeni tərəfdən kəşf etdi. Yeri gəlmişkən, İtaliya mətbuatında udinelilərin onu geri qaytarmaq niyyətində olması barədə xəbərlər peyda olub. Amma futbolçu yox, idman direktoru kimi. Qeyd olunur ki, hazırkı idman direktoru Federiko Baltsaretti qovulsa, onun yerinə məhz Arslan gətiriləcək. Hərçənd təcrübəli futbolçu hələ karyerasını bitirməyə hazırlaşmır. Üstəlik onun “Melburn Siti” ilə 2025-ə qədər müqaviləsi var. İtalyanlar iddia edir ki, “Udineze” Tolqayı bir mövsümlüyə futbolçu kimi geri qaytara və gələn mövsümdən onu idman direktoru edə bilər.

Bu arada karyerasını “Hall Siti”də davam etdirtən Abdulkadir Ömür də mükafat alıb. O, çempionşip təmsilçisində aprelin ən yaxşı futbolçusu seçilib. 24 yaşlı futbolçu ötən ay hesabına yalnız 1 məhsuldar ötürmə yaza bilmişdi. Buna baxmayaraq, türkiyəli vinger oyunu ilə diqqəti çəkməyi bacarmışdı. Bu üzdən sorğuda iştirak edən “Hall Siti” fanatlarının 42 faizi ona səs verib. Onu da bildirək ki, Abdulkadir ardıcıl 2-ci dəfə bu mükafata sahib çıxıb. O, martda da “pələnglər”in ən yaxşı oyunçusu seçilmişdi. “Hall Siti”nin fevralın 1-də 2,5 milyon avroya “Trabzonspor”dan transfer etdiyi Türkiyə yığmasının üzvü indiyə qədər bu klubda 16 qarşılaşmada 2 məhsuldar ötürmə ilə fərqlənib.