Tanınmış türkiyəli yarımmüdafiəçi Tolqay Arslanın yeni klubunun adına aydınlıq gəlib.

"Football-plus.az" xəbər verir ki, ''Udineze''dən ayrılan və sərbəst oyunçuya çevrilən 32 yaşlı futbolçu karyerasını Avstraliyada davam etdirməyə üstünlük verib.

Belə ki, Arslan bu ölkənin iddialı klublarından olan ''Melburn Siti'' ilə ikiillik müqavilə imzalayıb.

O, klubun saytına verdiyi açıqlamada bu qərardan məmnun olduğunu və ailəlikcə Avstraliyada yaşamaq istədiklərini vurğulayıb. Tolqay həm də hər 3 əmisinin Melburnda yaşadığını etiraf edib.

Qeyd edək ki, Almaniyada doğulan və Dortmund ''Borussiya''sının yetirməsi olan Arslan Türkiyədə ''Beşiktaş'' və ''Fənərbaxça''nın şərəfini qoruyub. O, ''Beşiktaş'' ilə 2 dəfə (2015/16, 2016/17) çempionluq sevinci yaşayıb. Tolqay 2020-dən bu yana ''Udineze''də forma geyirdi.

O, bu klubda 3 mövsüm ərzində 101 rəsmi oyuna çıxaraq 5 qol vura bildi.