Zaqreb "Dinamo"su sabah ÇL-in pley-offunun cavab matçında "Qarabağ"ın qonağı olacaq.

"Football-plus.az" xəbər verir ki, "mavilər"in baş məşqçisi Sergey Yakiroviç oyundan əvvəl keçirilən mətbuat konfransında jurnalistlərin suallarını cavablayıb.

- İlk oyunda 3:0 hesabıyla qalib gəldik. Buna baxmayaraq, cavab matçına da çox yaxşı hazırlaşmışıq. "Qarabağ" çox güclü komandadı. Xüsusilə, müdafiə xəttində daha diqqətli olmağa çalışacağıq.

- Oyundan sonra təyyarənin Bakıdan Zaqrebə doğru havalanması üçün 90 dəqiqə nəzərdə tutulub, yoxsa əlavə vaxt və ya penaltilər seriyası da nəzərə alınıb?
- Konkret vaxt nəzərdə tutulmayıb. Oyunun gedişindən asılı olaraq qərar verəcəyik.

- İlk oyundakı nəticənin ədalətli olduğunu düşünürsüzmü?
- Nəticənin ədalətli və ya ədalətsiz olması haqda şərh verə bilmərəm.

- "Qarabağ" "Ludoqorets"lə ilk oyunda məğlub olsa da, səfərdə rəqibini darmadağın etdi və komandanın baş məşqçisi istefa verdi. Eyni aqibəti yaşayacağınızdan qorxursuzmu?
- Həmin məşqçinin istefası haqda məlumatım yoxdu. Böyük ehtimalla, təqaüd yaşı çatdığına görə istefa verib. Kifayət qədər iddialıyam. Komandama inanıram. Belə halın yaşanacağını qətiyyən düşünmürəm.

- Millimizin üzvü Mahir Emreli "Dinamo"dan ayrıldı. Görəsən, Sergey Yakiroviçi futbolçunun hansı cəhətləri qane etmədi?
- Bir ildi ki, burdayam. Qışda aldığı zədə üzündən yaya qədər oyunlarda iştirak edə bilmədi. Onun bəxti gətirdi ki, "Nürnberq"ə keçid etdi. Mahirlə sağollaşmağımız hansısa pis səbəblə bağlı deyil.

- Bakıya hansı nəticə üçün gəlmisiz? Qələbə yoxsa heç-heçə?
- Bizi daha irəli aparacaq nəticə üçün gəlmişik. Məqsədimiz liqa mərhələsinə yüksəlməkdi.

- "Qarabağ" premyer-liqada keçirdiyi sonuncu matçda uduzdu. Rəqibinin məğlubiyyəti komandanı arxayınlaşdırır, yoxsa daha da ehtiyatlı olmağa çağırır?
- Hansısa nəticə bizə zəmanət vermir. "Ludoqorets"lə oyunda baş verənlər təkrarlana bilər. Və ya başqa nəticə...

KƏNAN BAHADIR