"Qarabağ" "Dinamo"ya öz meydanında 4 qol vura bilərmi? - Sergey Yakiroviç cavabladı
Zaqreb "Dinamo"su dünən Xorvatiya çempionatının 4-cü turunda "Qoritsa"nı qəbul etdi.
"Football-plus.az" xəbər verir ki, "Qarabağ"ın ÇL-in pley-offundakı rəqibinin baş məşqçisi Sergey Yakiroviç matç haqda danışarkən "köhlən atlar"la cavab oyunundan da bəhs edib:
"Komandamda müsbət ab-hava var. Çempionata yaxşı başladığımız kimi, avrokubokların ilk matçında da qalib gəldik. Azarkeşlərimizin çərşənbə axşamı keçirəcəyimiz oyuna gələ bilməsi sevincimizə sevinc qatdı. İnanıram ki, bizi Bakıda dəstəkləyəcək tərəfdarların sayı çox olacaq. "Qarabağ"la ilk oyunda çoxlu səhv etsək də, böyük üstünlük qazandıq. Amma bu bizi arxayınlaşdırmamalıdı. Çünki rəqib topu ələ keçirəndə maksimum yararlanır. Azərbaycanlılara cərimə meydançamıza 5 saniyədə yaxınlaşa bilər".
Mütəxəssis komandasının nə dərəcədə şanslı olduğunu da qiymətləndirib:
"Yeganə üstünlüyümüz 3:0 hesablı qələbədi. "Qarabağ" evində daha rahat olacaq. Azarkeşləri çoxdu. Təhlükəli vəziyyətlər yaradacaqlar. Əslində indi bunu bacarmayan komanda yoxdu. Sadəcə, qarşısını ala bilməlisən".
Yakiroviç "Qarabağ" "Dinamo"ya öz meydanında 4 qol vura bilərmi?" sualını belə cavablayıb:
"Ümumiyyətlə, "Qarabağ" çoxlu qol vura bilən komandadı. Bunu həm avrokuboklarda, həm də Azərbaycan çempionatlarında sübut ediblər. Önəmli olan bizim verəcəyimiz cavabdı. "Dinamo" çempionatın ilk dörd oyununda 12, avrokuboklarda bir oyunda 3 qol vurub. Yəni bizim göstəricilərimiz də pis deyil".
KƏNAN BAHADIR
Digər xəbərlər
