“Bilindiyi kimi, bu ildən premyer-liqa, 1-ci və 2-ci liqalarda mübarizə aparan bütün region təmsilçilərinə dəstəyimizdən faydalanmaq imkanı yaratmaq üçün onları coğrafi yerləşməyə əsasən 4 qrupa bölmüşük. Hər qrup üzrə strateji planlama, marketinq-kommunikasiya və gəlirlər sahələri üzrə dəstək göstərməyi planlaşdırırıq. Artıq Gəncədə 7 klubun iştirakı ilə strateji planlama seminarı keçirilib. Hazırda növbəti addımlar üzərində iş davam edir.

Yeni əməkdaşlığa başladığımız şimal və cənub klublarını vurğulaya bilərik. Artıq Xaçmazın “Şimal”, Qubanın “Hypers Guba”, Lerikin eyniadlı klubu ilə görüş baş tutub, 2024/25 mövsümü üçün planlar qurulub, işlər başlayıb. Həmçinin Quba, Xaçmaz və Lerik İcra Hakimiyyətlərinin başçıları ilə görüşlər keçirilib. Xaçmazda və Lerikdə kluba maliyyə cəlb olunması üçün “Biznes klub” layihəsi nəzərdə tutulub. Bununla bağlı hər iki bölgədən bir çox sahibkarla görüş keçirilir. Hazırda əməkdaşlıq etdiyimiz bütün region klubları ilə işlərimiz davam edir. “Şamaxı”, “Mingəçevir”, “Zaqatala”, “Şəmkir” ilə əməkdaşlıq planları hazırlanıb, işə qısa müddətdə start veriləcək. Sponsorluğa gəlincə, onu deyə bilərəm ki, əməkdaşlıq etdiyimiz hər bir bölgə ilə bağlı sponsorluq danışıqları aparılır. “Biznes klub” layihəsi sponsorluq danışıqlarının bir mərhələsidi. Bu platformanın əsas üstünlüklərindən biri də odu ki, burda sahibkarlarla davamlı ünsiyyətimiz olur. “Biznes klub”a qoşulan üzvlərin gələcəkdə sponsor olmaq ehtimalı da böyükdü. Necə ki “Zaqatala”da bu baş verdi.

Buna baxmayaraq, əsas gücü sadəcə sponsor axtarmağa yox, daha çox klubların dayanıqlı inkişafına, öz ayaqları üzərində durmasına, müxtəlif maliyyə kanallarının aşkarlanmasına, klubların inkişaf strategiyasının hazırlanmasından oyun gününün təşkilinə qədər bütün sahələrə sərf edirik”.