“Hədəfimiz premyer-liqada çıxış etmək olacaq” – icra başçısı ilə görüşən klubun idman direktoru
Dünən Xaçmaz rayon İcra Hakimiyyətinin başçısı Elnur Rzayev mayın 24-də Region Liqasının finalında oynayacaq “Şimal”ın rəsmiləri ilə görüşüb.
Görüşdə klubun prezidenti Qılman İbrahimov, idman direktoru Elxan Yusifli və baş məşqçi Tural Cəlilov iştirak edib. Klub adından Elnur Rzayevə xatirə hədiyyəsi təqdim olunub. Görüşdə hansı məsələlərin müzakirə olunduğunu öyrənmək üçün “Şimal”ın idman direktoru Elxan Yusifliylə əlaqə saxladıq:
“Bu görüşün təşəbbüskarı elə klub oldu. Elnur müəllim bizi qəbul etdi və finala yüksəldiyimizə görə də təbrik etdi”.
Klub rəsmisi ilə qarşıdakı hədəflərlə bağlı da danışdıq:
“Bilindiyi kimi, klubumuz yeni yaradılıb. “Şimal” yarananda ilk məqsədimiz 2-ci liqada mübarizəyə qoşulmaq idi. Lakin hədəfimiz böyük olduğu üçün ən sondan yüksəlməyi seçdik. Bu üzdən də Region Liqasında mübarizəyə başladıq. Heyətin əsasını şimal zonasından, əsasən də Xaçmazdan çıxan futbolçular təşkil edir. Təcrübəli futbol adamı Tural Cəlilovu da “Şimal”a baş məşqçi təyin etdik. Doğrusu, həvəskar liqa olduğu üçün heyətdəkilər müxtəlif işlərlə məşğuldu. Ancaq təcrübəli oyunçularımız və yaxşı hazırlıq nəticəsində finala yüksəldik. Hədəfimiz çempion olub, növbəti mövsüm 2-ci liqada mübarizə aparmaqdı. Buna nail olandan sonra hədəfimiz daha da böyümək, 1-ci liqa və premyer-liqada çıxış etmək olacaq”.
KAMAL SƏFƏR
Digər xəbərlər
