Fransa çempionatının elitasında 87-ci mövsüm ötən cümə keçirilən “Havr” – PSJ oyunu ilə start götürdü.

İlk tur maraqlı keçdi. PSJ səfərdə “Havr”ı darmadağın etdi, “Monako” “Sent-Etyen”lə oyunda çətinlik çəkdi, “Brest” “doğma divarlar” arasında “Marsel”ə uduzdu.
Mbappesiz və yenilənmiş PSJ “Havr”ın qapısına artıq 3-cü dəqiqədə yol tapdı. Ardından elə həmin hesabı açan Ramuş zədələnənə qədər meydanda heç bir maraqlı hadisə baş vermədi. 2-ci hissə başlayan kimi “Havr” gözlənilmədən hesabı bərabərləşdirdi. Hər kəs qonaqların mövsümə xal itkisi ilə başlayacağını düşünürdü. Ancaq PSJ son 5 dəqiqədə üç qol vurdu. Dembele, Barkola və Kolo Muaninin qolları ilə çempion inamlı qələbə qazandı.

Vitse-çempion “Monako” “Sent-Etyen”lə oyunun 28-ci dəqiqəsində irəli çıxdı. “Yaşıllar” sona qədər çox çalışsalar da, məğlubiyyətdən qurtula bilmədilər.
PSJ və “Monako” kimi ÇL-in qrup mərhələsində oynayacaq “Brest” italiyalı Roberto De Zerbinin çalışdırdığı “Marsel”i qəbul etdi. Qonaqlar 3-cü dəqiqədə hesabı açdı. Marsellilərin baha debütantı Qrinvud fərqləndi. 9-cu dəqiqədə meydan sahibləri hesabı bərabərləşdirmək üçün əla imkan qazansa da, Del Kastilyo penaltini qaçırdı. Bundan sonra cənublular hücumda fəallaşdı. 26-cı dəqiqədə Qrinvud Luis Enrikenin fərqlənməsinə şərait yaratdı. 32-ci dəqiqədə elə həmin Qrinvud penalti qolu ilə fərqi darmadağın həddinə çatdırdı. Bir qədər sakitləşən “Marsel” “Brest”ə qollardan birinin əvəzini çıxmağa imkan verdi. Amma 2-ci hissə başlayan kimi Luis Enrike yenə 3 top fərqini bərpa etdi. Darmadağında son nöqtəni isə mövsümlərarası fasilədə “Lans”dan 25 milyon avroya alınan Vai qoydu.

“Lill” “Reyms”in qonağı idi. Oyunun həlledici məqamı meydan sahiblərinin təcrübəli yarımmüdafiəçisi Konenin 16-cı dəqiqədə birbaşa qırmızı vərəqə ilə qovulması oldu. Onun başına dirsək zərbəsi vurduğu Qomes əvəzləndi. Zərbədən huşunu itirən ingiltərəliyə uzun müddət meydanda yardım göstərildi, ardından xəstəxanaya aparıldı. Məcburi fasilə yarım saat çəkdi. 45-ci dəqiqədə oyun bərpa olundu. Baş hakim ilk yarıya 34 dəqiqə artırdı və həmin vaxtın 30-cu dəqiqəsində Diakite hesabı açdı. “Şimallı itlər” 2-ci hissədə hesabı qorumaq üçün oynadı. Uzatma dəqiqələrində sonradan meydana çıxan Devid “Lill”in qələbəsini möhkəmləndirdi.
“Renn” evdə “Lion”la qarşılaşdı. Meydan sahibləri favorit sayılırdı, çünki qonaqların baş məşqçisi Pyer Saj komandanın liderlərindən Lakazett ilə Talyafikonun xidmətindən məhrum idi. “Şirlər” onların yoxluğunda böyükhesablı məğlubiyyətlə üzləşdi. Hesabı 19-cu dəqiqədə Burijo açdı, cəmi iki dəqiqə sonra isə Quiri fərqi artırdı. 71-ci dəqiqədə “Lion”un yeni ulduzu, son Avropa çempionatında Gürcütan yığmasının heyətində özünü yaxşı göstərən Mikautadze penaltini boşa verdi. Final fitinə az qalmış Meyster “Lion”un qapısından daha bir top keçirdi.
Turun qalan oyunlarına gəlincə, “Oser” evdə “Nitsa”nı, “Lans” səfərdə “Anje”ni məğlub etdi. “Monpelye” – “Strasbur”, “Tuluza” – “Nant” oyunlarında heç-heçə qeydə alındı.

1-ci tur
Havr – PSJ 1:4
Lyoris, 48 – Li Kan İn, 3. Dembele, 85. Barkola, 86. Kolo Muani, 90-p. (23167)
PSJ: Donnarumma, Hakimi, Paço, Beraldo, Zaqe (Markinyos, 71), Zair-Emeri, Vitinya, Li Kan İn (Dembele, 70), Asensio (Barkola, 71), Ramuş (Kolo Muani, 20), Mbaye (Neveş, 46).

Monako – Sent-Etyen 1:0
Minamino, 28. (14250)
Monako: Kyon, Vanderson, Kerer, Salisu, Yakobs, Minamino, Kamara, Zakariya (Maqassa, 76), Ben Seqir (İlenihena, 81), Embolo, Baloqun (Akliuş, 69).

Brest – Marsel 1:5
Kamara, 45+6 – Qrinvud, 3; 32-p. Luis Enrike, 26; 48. Vai, 69-p. (14962)
Brest: Bizot, Lala, Şardonne, Le Kardinal, Amavi (Zoqbe, 84), Marten (Mbok, 70), Kamara, Pereyra Laqe (Kamblan, 70), Del Kastilyo, Ajork (Fevr, 64), Le Duaron.

Reyms – Lill 0:2
Diakite, 45+30. Devid, 90+3. (14755)
Lill: Şevalye, Santoş, Mandi (Menye, 73), Diakite, Aleksandro, İsmaili (Qudmundsson, 83), Kabella (Mbappe, 83), Mukau (Buaddi, 73), Qomes (Haraldsson, 46), Sahraui, Bayo (Devid, 46).

Oser – Nitsa 2:1
Raveloson, 44. Kulibali, 90+5 – Şo, 21. (16354)

Renn – Lion 3:0
Burijo, 19. Quiri, 21. Meyster, 90+1. (26026)

Monpelye – Strasbur 1:1
Savanye, 67-p. – Diarra, 58. (15500)

Anje – Lans 0:1
Said, 28. (14811)

Tuluza – Nant 0:0
(25491)

Bombardirlər: Luis Enrike, Qrinvud (hər ikisi “Marsel”) – 2.

Növbəti turun oyunları avqustun 23-25-i aralığında keçiriləcək: PSJ – Monpelye, Lion – Monako, Lill – Anje, Sent-Etyen – Havr, Lans – Brest, Nitsa – Tuluza, Strasbur – Renn, Nant – Oser, Marsel – Reyms.

Turun rəqəmi
1 – PSJ 2016-cı il noyabrın 5-dən bəri Liqa 1-də 85-ci dəqiqədən sonra ən azı üç qol vuran ilk komandadı. Həmin vaxt “Monako” – “Nansi” oyununda “knyazlar” eyni uğura nail olmuşdu.
Turun ulduzu
Meyson Qrinvud (Marsel) – ingiltərəli hücumçu komandasının qələbəsinə iki qol və bir məhsuldar ötürmə ilə töhfə verdi. Ötən mövsüm “Xetafe”nin heyətində yetərincə yaxşı təsir bağışlayan Meyson indi də Fransa publikasının qəlbini fəth etməkdədi.
Turun sitatı
Anxel Qomes, “Lill”in yarımmüdafiəçisi: “Artıq evdəyəm. Özümü normal hiss edirəm. Tibb korpusumuzun mənə yardım edən bütün nümayəndələrinə təşəkkür etmək istəyirəm. Ağılsız toqquşma idi, futbolda belə şeylər olur. Əsas odu ki, sağlıq durumum qaydasındadı, komandam isə qalib gəlib. Hər iki komandanın fanatlarına təşəkkür edirəm. Mənə bir daha hava mübarizəsinə girişməməklə bağlı xəbərdarlıq edin”.