Əvvəl 1-ci liqaya, ardından premyer-liqaya! - “Şəfa”nın təqdimat mərasimi keçirildi
Dünən 2-ci liqada mübarizə aparan “Şəfa” üçün özəl gün oldu.
“Marriot” otelində klubun rəsmi təqdimat mərasimi keçirildi. İmzalama mərasimində klub rəsmi şəkildə “My Group Holding”in balansına daxil oldu. Saat 17.00-da başlayan tədbirdə həm klub nümayəndələri, futbolçular, məşqçilər, həm də media iştirak edirdi. Klub prezidenti Sərdar Salmanzadə əvvəlcə yeni işbirliyi barədə məlumat verdi:
“Təxminən 4 aya yaxındı “Şəfa”nı himayəsinə alan “My Group Holding”ə təşəkkür edirəm. Strategiyanı dəqiqləşdirmişik. Yeni mövsümdə 1-ci liqaya, sonrakı il isə premyer-liqaya yüksəlmək istəyirik. Məqsədimiz avrokuboklardı. Həmçinin Azərbaycanın 14, 15, 16 yaşlı uşaqlarının klub vasitəsilə xaricə çıxarılması və futbol təhsili alması yolunda işləri davam etdirəcəyik. Fürsətdən istifadə edib bacarıqlı uşaqları “Şəfa”ya dəvət edirəm”.
Daha sonra şirkət rəsmiləri gələcək planlarından söz açdı. Klubun yeni stadion tikintisi üçün yer axtardığı bildirildi. Həmçinin bu mövzuda tələsmədikləri, əvvəlki “Şəfa” əzəmətini insanların qəbul etməsi, stadionlara azarkeşlərin cəlb olunması əsas hədəf kimi vurğulandı. Şirkət rəsmiləri komandanın heç bir maddi sıxıntısının olmayacağını, nəzərdə tutulan planarın yaxın illərdə reallaşdırılması üçün lazımı addımların atılacağını dedilər. “Şəfa” ikinci liqanın tanınmış futbolçularını da heyətə cəlb edib, Nadir Əliyevi isə baş məşqçi təyin edib. Şirkətlə və futbolçularla klub arasında müqavilə imzalandı, yeni formalar təqdim olundu. Tədbirin sonunda iştirakçılar “coffe-break”ə dəvət edildi.
RÖYANƏ OĞUZ
Digər xəbərlər
