Vüqar Nadirov hesabı açdı, komandası 2-ci liqaya vəsiqə qazandı - REPORTAJ
“Şimal” Region Liqasının qalibi kimi futbol üzrə ölkə çempionatının 2-ci liqasına vəsiqə qazanmışdı.
Dünən daha bir komanda eyni hüquqa yiyələndi. Region Liqasının finalçısı "Hypers" 2-ci liqanı 13-cü pillədə bitirən "Şəfa" ilə pley-off mərhələsinin cavab görüşündən də qalib ayrıldı – 2:1. İlk oyunda da qələbə qazanan (2:0) Vüqar Nadirovun komandası gələn mövsüm 2-ci liqada oynayacaq. "Şəfa" isə yeni mövsümdən Region Liqasında çıxış edəcək.
Maraqlıdı ki, “Hypers” – “Şəfa” oyununda hesabı 2-ci dəqiqədə məhz Vüqar Nadirov açıb. 45+2-ci dəqiqədə Məhəmməd Alıyev fərqi artırıb. “Şəfa”nın təsəlli qolunu 65-ci dəqiqədə Ramiz Qasımov vurub.
Oyundan sonra Vüqar Nadirovun fikirlərini öyrəndik:
“İlk matçda 2:0 hesablı qələbə qazanmağımıza baxmayaraq, ağır bir oyun keçdi. Rəqibin oyununu təhlil etmişdik. İlk qarşılaşmada müəyyən səhvlərə yol vermişdik və bu səhvlərin üzərində işlədik. Komandamız yetərincə yaxşı oynadı və uğur qazandı. Rəqib komandaya uğurlar arzulayıram. “Şəfa” Region Liqasında yaxşı çıxış edər və yenidən 2-ci liqaya qayıdar. Bu qələbə komandanın yeni hədəflərə fokslanmasına kömək olacaq. Qarşıdakı hədəfimiz daha yaxşı oyun göstərib, 1-ci liqaya adlamaqdı. Həmçinin növbəti illərdə premyer-liqaya yüksəlmək. Yeni transferlərlə bağlı çalışmalarımız gedir. Yeni futbolçuları komandamıza cəlb etməyə çalışacağıq. Komandamızdakı bəzi futbolçularla yolları ayıracağıq. Transferlər etməklə komandaya yeni güc, yeni nəfəs gələcək”.
ƏSƏD SEYİDOV
