“Şəfa” hansı rayonu təmsil edəcəyi ilə bağlı qərar verməyib
Cari mövsümdə 2-ci liqada mübarizə aparan “Şəfa”nın çempionatdakı taleyi Region Liqasının finalçısı ilə pley-off oynayandan sonra müəyyənləşəcək.
Bir neçə gün bundan öncə isə klubun sponsorunun dəyişdiyini xəbər vermişdik. Belə ki, hazırda “AGAH GROUP”u “MY GROUP Holding” əvəzləyib. Klub ətrafında ajiotaj yaradan məsələlərdən biri isə növbəti mövsümdən etibarən hansısa bölgəni təmsil edəcəyinin deyilməsidi. Artıq bu barədə tirajlanan xəbərlərin sayı artmaqdadı. Başverənlərlə bağlı ətraflı məlumat öyrənmək üçün klubun yeni idman direktoru Elvin Ələsgərovla danışdıq:
“Komandamız 2-ci liqadakı yerini qorumaq üçün qarşıdakı günlərdə Region Liqasının finalçısı ilə pley-off oynayacaq. Təxminən 10-15 gündən sonra bu barədə ictimaiyyətə dəqiq məlumat veriləcək. Amma klubun “MY GROUP Holding” tərəfindən alındığı doğrudu. Yeni sponsorlar da cəlb edilib, yəni klubun inkişaf potensialı, strategiyası var. İnanırıq ki, gələcəkdə yaxşı işlər görəcəyik. Klubun hansısa bölgəni təmsil etməsinə gəlincə, bu barədə yalnız pley-off matçından sonra rəsmi açıqlama veriləcək. Doğrudu, bu haqda danışıqlar aparılıb, lakin hələ heç bir qərar qəbul edilməyib. Bir yox, bir neçə rayonun adı hallanıb. Ancaq nəticə etibarilə heç bir qərar qəbul edilməyib”.
2-ci liqadan düşmək təhlükəsiylə üz-üzə qalan kluba qısa bir müddət ərzində sahib çıxılması sual yaratdı. Yeni sponsorun belə addım atmaqda əsas məqsədinin nə olduğu ilə bağlı sualımıza isə klub rəsmisi belə cavab verdi:
“Bura gəlişimizdə əsas məqsəd potensialı olan klubun, həm əsas, həm də uşaq futbolunun inkişaf etdirilməsidi. Həmçinin infrastruktur və peşəkar klub üçün lazım olan hər şey əsas hədəfimizdi. Artıq bu istiqamətdə addımlar atmışıq. Əsas məsələlərdən biri olan klubun bəzi borclarını bağlamışıq. Qısa müddətdi burdayıq. Bu məhdud zaman kəsiyində komandanın məşq keçdiyi yeri dəyişdik, Abşerondan “ASK Arena”ya gəldik. Hazırda futbolçularımız daha yaxşı şəraitdə məşq edir”.
KAMAL SƏFƏR
Digər xəbərlər
