"Sabah" Konfrans Liqasının 3-cü təsnifat mərhələsinin ilk oyununda inamlı təsir bağışlamadı. Evə məğlub dönən Masazır təmsilçisi şansını növbəti görüşə saxladı.

Ümumiyyətlə, komandanın oyun üslubu da izləyənləri qane etmədi. Son oyunla bağlı "Sabah"ın idman direktoru İqor Ponomaryovla danışdıq.

— "Sent Patriks"ə məğlubiyyətin səbəbi nə oldu? Komandanın çıxışından razısızmı?
— Təbii ki, daha yaxşı oynamaq istəyirdik. Çoxlu top itkisinə yol verdik. Hava da "ingilis havası" idi, yağış yağırdı. Bunun da rol oynadığını deyə bilərəm. Rəqib belə havaya öyrəşib. Oyuna yaxşı başladıq, topa nəzarət edirdik, bir-iki yaxşı şans yaratdıq, həmin dəqiqələrdə qol vursaydıq, oyun tam başqa xarakter alacaqdı. Matç irəlilədikcə "ipi əldən verdik". Nəticədə ilk yarıda qol buraxdıq.

 — Lepinitsanın "qırmızı" alması futbolçunun günahı idi, yoxsa hakim sərt qərar verdi?
— İkinci hissənin lap əvvəlində dayaq yarımmüdafiəçimiz meydandan qovuldu. Şəxsən mən belə hesab edirəm ki, hakim bizə erkən sarı vərəqələr verdi. İvan Lepinitsaya ikinci "sarı"nı göstərməkdə də tələsdi. Azlıqda qalan komandanın mübarizə aparması çətin idi. Nəticədə gözləmədiyimiz şəkildə 1:0 hesabı ilə uduzduq.

— İrlandiya təmsilçisi "Sabah"ı daha yaxşı təhlil etmişdi?
— Bu, mənə yox, məşqçilər korpusuna veriləsi sualdı. Bizdə məşqçi korpusuna məsləhətlər verən analitik qrupu var.

— "Sabah"da yeni transfer olacaq, ya yox?
 — Başa düşürəm ki, bizə daha bir mərkəz müdafiəçisi lazım idi və onu da aldıq. İqor Noqeyronun komandaya uyğunlaşması üçün vaxt lazım olacaq.

— Cavab görüşündən gözləntiləriniz nədi?
— Ümid edirəm ki, uşaqlar cavab oyununa böyük motivasiya və növbəti mərhələyə yüksəlmək arzusu ilə yanaşacaq. İndi daha güclü olduğumuzu sübut və rəqibi iki top fərqi ilə məğlub etmək üçün yaxşı şansımız var. Ümid edirəm ki, sevinən tərəf biz olacağıq.

RÖYANƏ OĞUZ