“Yeni mövsüm üçün heyətimiz formalaşıb. 24 futbolçuyla anlaşmışıq. Komandamız hazırda Qusarda - təlim-məşq toplanışındadı. Ötən il 1-ci liqada ən yaxşı oynayan futbolçuları kluba cəlb etmişik. Ötənilki legionerlərlə yollarımızı ayırıb, daha keyfiyyətli legionerlər gətirmişik. Hədəfimiz premyer-liqadı. Birinci liqada yeganə sponsorlu klub bizik – biri “RDC Group”, digəri isə “Daşlı Bulaq”dı. Maliyyə ilə bağlı çətinliyimiz yoxdu. Büdcəmiz ötənilkindən az deyil. Əsas hədəfimiz infrastrukturla bağlıdı. Bilindiyi kimi, təbii ot örtüyünü bərpa etdik ki, buna da ciddi vəsait xərclənib. Süni meydançanın da üzərində işləyirik. Bu məsələdə AFFA bizə dəstək verdi. Razılıq verilib, indi qalıb onu dəyişmək. Otel, baza, strukturda olan çatışmazlıqları aradan qaldırmaq əsas planlarımızdandı. Onların üzərində iş gedir, demək olar, bir hissəsi qalıb. İnşallah, yaxın vaxtlarda “İmişli”ni premyer-liqada görəcəksiz. İstəyirik ki, elitaya hazır gələk. Bütün problemləri aradan qaldırmasaq da, nöqsanlarımız olmasın. Diqqət yetirdiyimiz məqamlardan biri də uşaq futboludu. Yaxın zamanda Mərkəz zonasında böyük bir mərkəz yaradacağıq ki, istedadlı uşaqları yetişdirək. Bu yöndə də işlərimiz davam edir, komandanın hədəfləri müəyyənləşir. Yeni mövsümdə çempionatın maraqlı olacağına və hədəflərimizin reallaşacağına inanırıq”.