“İclasımız əsasən birinci dövrənin nəticələri barədə oldu, eyni zamanda infrastrukturla bağlı görəcəyimiz işlər və premyer-liqaya lisenziya almaq üçün lazımi sənədləşmə aparmaq müzakirə olundu. Hədəfimiz premyer-liqadı. Əlbəttə, indi olduğumuz yer bizi qane etmir. Bunun üçün komandamızı daha da gücləndirməyi planlaşdırırıq. Eyni zamanda, gənc və potensiallı futbolçuları komandamıza cəlb etmək barədə düşünürük. Birinci dövrədə zədələnən futbolçularımız çox oldu və gözləmədiyimiz xərclər oldu. Məyusluq hissi ilə deyə bilərəm ki, çox istedadlı futbolçumuz Muxtar Nəzərlinin ayağının çarpaz bağları qırıldı. Oyunçunun Türkiyədə əməliyyat olunmasını planlaşdırmışıq. Çox güman, yaxın günlərdə yola düşəcək. Xırda zədələr AFFA-nın reablitasiya mərkəzində, milli komandanın həkimləri tərəfindən müalicə edildi. Göstərdikləri dəstəyə görə AFFA rəhbərliyinə təşəkkürümüzü bildiririk. Əlbəttə, 1-ci liqa klublarının əksəriyyətinin stadion vəziyyəti qənaətbəxş deyil. Bu da öz növbəsində daha çox zədələnmələrə səbəb olur. Bir neçə futbolçuyla artıq yollarımızı ayırmışıq. Yeni oyunçuları komandamıza cəlb etmək üçün futbolçular və onların menecerləri ilə danışıqlar aparırıq. İnşallah, yaxın günlərdə komandamıza qoşulan oyunçular barədə mətbuat xidmətimiz tərəfindən “instaqram” və “feysbuk” sosial şəbəkə hesablarımızda məlumat veriləcək. Bildiyiniz kimi, iki sponsor (RDC ilə “Daşlı bulaq” nəzərdə tutulur – red.) komandaya cəlb edilib, başqa sponsorlorla da danışıqlar gedir. Sizin vasitənizlə azərkeşlərimizə bildirmək istəyirəm ki, narahat olmasınlar. Yaxşı transferlərimiz olacaq. Planımız Aran bölgəsinin ən güclü komandasını yaratmaqdı. Hədəfimiz premyer-liqadı və bunun üçün də əlimizdən gələnin ən yaxşısını etməyə çalışırıq”.