Futbol üzrə ölkə çempionatının 1-ci liqasında elitaya yüksəlmək uğrunda gərgin mübarizə davam edir.

Lider “Qaradağ-Lökbatan”dan 3 xal geridə olan “İmişli”də iddialılar sırasındadı. 39 xala malik bölgə təmsilçisi premyer-liqaya yüksəlməyə real namizədlərdən biridi. Bəs hazırda bu yöndə hansı addımlar atılır? “İmişli”nin icraçı direktoru Aqşin Mürsəlov “Football-plus.az”la söhbətdə bu və başqa məqamlara aydınlıq gətirdi.

- 10 komanda arasında 2-ci yerdəsiz. Çempion olmağa nə maneə ola bilər?
- Yeganə maneə özümüz ola bilərik. Çünki keyfiyyətli futbolçulara, bacarıqlı məşqçilərə sahibik. Sponsor maddi dəstək göstərir.

- İlk “beşlik”də sıxlıqdı. “İmişli”nin mövsümdən əvvəl hədəfi nə idi?
- Yalnız birinci olmaq. Tarixə düşmək istəyirik və buna yaxınıq.

- Premyer-liqada iştirak edə bilmək üçün hazırlıq görülür?
- Lisenziyalaşdırma qrupuna müraciət etmişik. Tezliklə lisenziyanı təmin edəcəyik. Stadiondakı hazırlıq əsasən ot örtüyü ilə bağlıdı. Qazon təbiidi. Bir neçə şirkətlə danışıq aparılır. Yaxın günlərdə əməkdaşlıq müqaviləsi imzalanacaq.

- Deyilənlər təsdiqini tapsa, premyer-liqada komanda sayı artırılacaq. Mövsümü ikinci sırada bitirsəz, sizə şans verilə bilər?
- Premyer-liqada komanda sayının artması labüddü. 1-ci liqada çempionluq uğrunda gərgin mübarizə gedir. İlk “dördlük”də yer alanların xalları çox yaxındı. Hətta bir oyun xal itirsən, ciddi dəyişiklik olur. Biz meydanda sona qədər vuruşacağıq. Başqa məqamlara zaman aydınlıq gətirəcək.

- Elitada iştirak edə bilmək üçün infrastruktur baxımından hansısa çətinlik var?
- Çoxdan “İmişli”də böyük futbol yox idi. Stadionda təmir işləri görülməlidi. Bu məsələni ən qısa zamanda həll edəcəyik. İşlərimiz davam edir.

RÖYANƏ OĞUZ