Dünən “Qarabağ” evdə “Ludoqorets”ə 1:2 uduzmaqla şansını səfər oyununa saxladı.

Ağdamlıların qapıçısı Fabian Buntiç oyundan sonra “Football-plus.az”ın suallarını cavabladı.

- Oyunla bağlı fikirlərin necədi?
- Fikrimcə, biz qələbəyə daha çox layiq idik. Daha güclü komandayıq, üstün idik, nəinki rəqib. Amma başımızı aşağı salmırıq, çünki biz "Qarabağ"ıq. Özümüzu bir həftə sonra daha yaxşı göstərəcəyik. Yaratdığımız şanslardan daha çox faydalanmalıyıq. Bu dəfə çox epizodumuz olsa da, təəssüf ki, 1 qol vura bildik. Mənə elə gəlir ki, gələn həftə bunu daha yaxşı formada edə biləcəyik.

- Oyundan əvvəl belə nəticə gözlənilmirdi, əksinə, futbol adamları sizin qalib gələcəyinizə dair proqnozlar verirdi. Bugünkü məğlubiyyətdə hakim nə dərəcədə rol oynadı?
- Mənə elə gəlir ki, hakimi günahlandırmaq düzgün olmaz. Hə, rəqib çalışırdı ki, hücumlarımızı qaydaları pozmaqla dayandırsın. Buna baxmayaraq, təcrübə qazandıq, gələn həftə daha yaxşısını edəcəyik. Yəni günahı hakimlərin üstünə atmazdım. Amma bəzi epizodlarda rəqib oyunçulara "sarı" göstərə bilərdi, göstərmədi.

- Hazırda Şahruddin Məhəmmədəliyevlə Amin Ramazanov zədəlidi, əsas qapıçı sənsən. Avrokuboklara öyrəşmisən, yoxsa üzərində işləməli olduğunu düşünürsən?
- Belə oyunlara öyrəşmişəm. Çünki Portuqaliyada oynayanda Çempionlar Liqasında çıxış edən komandalara qarşı oynamışam. Amma bu il daha yaxşı komandada forma geyirəm. Güclü komandadayam, yaxşı ab-hava var. Belə atmosferə öyrəşmişəm. İstərdim ki, azarkeşlər həmişə oyunlarımıza gəlib, bu cür dəstək olsunlar. Möhtəşəm idi. Ümid edirəm ki, çempionat oyunlarında da bu dəstəyi hiss edəcəyik.

- Çempionatdan gözləntilərin?
- Hədəfimiz hər oyunda qələbədi.

RÖYANƏ OĞUZ