"Araz-Naxçıvan" Misli Premyer-liqasının 2-ci turunda Bakıda "Qəbələ"yə qalib gəlib - 2:0.

Qarşılaşmada Naxçıvan təmsilçisinin ilk qolunu vuran belçikalı yeni transfer İsmayıl Azzoui "Football-plus.az" saytının suallarını cavablandırıb.

- Bu gün qol vurdun və qalib gəldiniz. Oyun haqda təəssüratların...
- Məncə, bu oyunumuzdan da nəticə çıxartmalıyıq. Meydanda kifayət qədər yaxşı idik, amma qol vura bilmirdik. Bu gün biz ən yaxşı oyunumuzu oynamadıq. Lakin komandamız meydanda çalışırdı. Sadəcə, epizodları qola çevirə bilmirdik. Qələbəyə görə uşaqları təbrik edirəm. Onlar əllərindən gələni edirdilər.

- Növbəti turda güclü "Qarabağ"la qarşılaşacaqsınız. Bu oyun barədə nə deyə bilərsən?
- "Qarabağ" həqiqətən çox yaxşı komandadı. Bunu hər kəs bilir. Məncə, biz hər komandaya qarşı yaxşı oynaya bilərik. Hər gün daha yaxşı oluruq. Bizim hazırlaşmaq üçün vaxtımız da az oldu. Buna görə də biz hər gün daha yaxşı olmaq üçün çox çalışırıq. Düşünürəm ki, biz "Qarabağ"a qarşı yaxşı oyun göstərəceyik və qalib gəlməyə çalışacağıq.


- Çempionatdakı hədəfləriniz nədi?
- Məncə, çempionatdakı hər bir oyuna ayrı-ayrılıqda baxmalıyıq və analiz etməliyik. Yeni komandayıq, yeni quruluruq. Baş məşqçimiz üçün də ilk çempionatdı. Hər oyun əlimizdən gələnin ən yaxşısını etməyə çalışmalıyıq. Üzərimizdə avrokuboklara düşmək təzyiqi olmamalıdı.

CAVİD ƏLİYEV